Demokraatit kamattut: Naalakkersuisut imigassamik nammineerlutik qanittumi matusisinnaanngussagunartut
Ukiut marluk matuma siorna siullermik taamaaliortoqarpoq. Taamalu januaarimi aamma pisoqaqqippoq februaarimilu kommunini sisamani matulluni. Imigassallersinnaaneq matuneqarpoq, pisiniarfinnilu viininut, immiaaqqanut imigassanullu immikkoortortaqarfiit assersorneqarlutik.
Tamanna coronamik tuniluunnerup piffissami tassani unitsinniarnerani aamma peqqinnissaqarfiit ulapputingaatsiarneranni pcr-imillu misissuisoqarsinnaannginneranni pivoq.
Taamani borgmesterit Naalakkersuisunut imigassamik matusisoqarnissaanut qinnuteqarput, Naalakkersuisullu akuersissutik.
Inatsit una - inatsisissatut siunnersuut akuerineqasappat - Inatsisartut imigassaq pillugu inatsisaannut ilanngunneqarsinnaavoq:
"Nappaatit tunillaassortut akiorniarlugit iliuutsit pillugit Inatsisartut peqqussutaanni eqqaaneqartutut inuiaqatigiit nappaammut illersorneqarnissaasa pisariaqalernerata malitsigisaanik nunamut tamarmut ilaannaanulluunniit piffissamut aalajangersimasumut imigassanik aalakoornartortalinnik tuniniaanermut sassaalliinermullu killilersuineq utaqqiisaasumilluunniit inerteqquteqarneq pillugu malittarisassanik Naalakkersuisut aalajangersaasinnaapput.”
Kommunit imigassamik inerteqquteqarallarnissamut killiliinissamulluunniit ullumikkut nammineerlutik qinnuteqartarput. Tamatuma kingorna Naalakkersuisut akuersisarlutik.
Aajangiinerli taanna kommunit suliassaannit maanna tiguneqassaaq. Naalakkersuisummi unitsitsinissamut siunissami aalajangiisarusupput. Tamanna tuniluunnerup pakkersimaarnissaanut iliuusissatut pilersaarutip ilagaa.
- Iliuuseqapallattoqartariaqarneranik corona ilikkagaqarfigaarput. Taamaattumik naalakkersuisut tassunga piginnaaneqassapput, peqqinnissamut naalakkersuisoq, Kirsten Fencker (Naleraq) suliap Inatsisartuni sapaatip akunnerata siuliani suliarineqarnerani oqarpoq.
- Tamanna kommuninut upperinninnginnitsinnik isumaqanngilaq. Kommunit suli kissaateqarsinnaassallutillu Inatsisartunut siunnersuuteqarsinnaassapput.
Allatut oqaatigalugu: Kommunit namminneerlutik kissaateqartassagunik Naalakkersuisullu akuerseqqaarlutik tamatuma sukkanera naammanngilaq.
Angerlarsimaffimmi eqqissiviilliornerit 100 procenteriaammik amerlisut
Kommunit qinnuteqarneratigut imigassamik inerteqquteqartoqalerpoq. Kalaallit Nunaanni Politiillu taakkununnga tapersiipput. Inuimmi imigassarsisinnaanngikkaangamik angerlarsimaffimmi eqqissiviilliornerit ikinnerulertartut misilittakkat takutippaat.
Nunatsinnilu angerlarsimaffimmi eqqissiviilliornerit amerlassusaat imigassamik inerteqquteqarnermi ikilipput. Siorna januaarip naanerani sapaatit akunnerisa naaneranni kingullermi angerlarsimaffimmi eqqissiviilliornerit 51-iupput – taakku ukioq manna 13-iupput.
AAMMA ATUARUK Angerlarsimaffimmi eqqissiviilliornerit imigassamik inerteqquteqarnerup nalaani ikinnerusut
Imigassamik inerteqquteqarneq atuukkunnaarmat angerlarsimaffimmi eqqissiviilliorneit 100 procentit sinnerlugit amerlipput.
- Pisiniarfinni imigassarsisinnaanerup namminerisamillu angerlarsimaffimmi imigassamut atatillugu ajornartorsiutit akornanni ersarissumik ataqatigiittoqarpoq. Tassa inuiaqatigiinni ajornartorsiutit. Ilanngunneqanngitsoqarani: Imigassaq matuneqaraangat politiit suliassaasa amerlassusaat ikilingaatsiartarput. Ammaqqikkaangallu suliassat amerleqqittarlutik. Nakuusernermut tunngatillugu suliaq amerlanerpaartaat imigassartornermik aamma ilaqartarput, politimesteri, Bjørn Tegner Bay KNR-imut februaarimi oqarpoq.
Demokraatit: Nammineersinnaassusiiaaneq
Inuit Ataqatigiit, Naleraq, Siumut Atassullu Naalakkersuisut ”inuiaqatigiinnut aarlerinartoqarpat” imigassamik killiliisinnaanngortinnissaannut imaluunniit inerteqquteqarsinnaalernissaannut tapersiipput. Partii ataasiinnaq akerliuvoq. Tassalu Demokraatit akerliusuullutik.
- Pisariaqanngilluinnarpoq Naalakkersuisut pisinnaatitsissumik tunissallugit imigassanik sassaalliinermut matusinerni. Tunngavigaarput, coronap ajornartoortitsinerani ilikkakkagut. Coronap ajornartoortitsinera ilinniutigisimagaanni, taava sooq inatsit allanngortinneqassava, aqutsineq tassunga tunngasoq qitiusumit ingerlanneqartillugu, kommunit aqussinnaasaraluat?, Ilaqutariinnut Peqqinnissamullu ataatsimiititaliami siulittaaup tullia, Anna Wangenheim oqarpoq.
AAMMA ATUARUK Nunatsinni tamarmi imigassamik inerteqquteqarneq atuukkunnaassasoq
- Tassami ilikkarsimavarput, qanoq annertutigisumik tuniluunnerup pakkersimaarsinnaanera kommunini aaqqissuussinikkut suliniuteqarnikkullu ingerlanneqarpata. Sooruna Naalakkersuisut innuttaasut kommunillu ingerlatsivii nammineersinnaassusiiarniaraat?
- Isumaqarpugut, akerlianik tatiginninnermik suleqatiginnissuseqarnermillu takutitsisoqartariaqartoq ”naliginnaasumik ulorianartup” aammalu ”inuiaqatigiinnut ulorianartorsiortitsisup” piffinni aqussinnaasariaqarmat uanilu pineqarpoq kommunenit.
Demokraatit tassunga taarsiullugu atornerluisuunermik katsorsaasarneq ukkatarinerorusunneruaat.
- Pingaartumik pissutigaara, imigassartoriaasitsinnut isummernissamut qunusoqarnera imaluunniit isummertoqannginnera, qanorlu iliorsinnaanersugut tamanna pillugu. Tassami ilumoortoq imaappoq, agguaqatigiisillugu nunanut allanut sanilliulluta imernerunngilagut, ajoraluartumilli arlalissuit, imigassartorpallaarlutik. Ima annertutigisumik aqussinnaajunnaarlugu. Inerteqquteqarneq pitsaasuunngilaq, atornerluisunillu katsorsaanerup ukkatarineqarnerunissaa, Anna Wangeheim oqarpoq.
Suliaq maanna Peqqinnermut Ilaqutariinnullu ataatsimiititaliamut maanna nassiunneqarpoq. Taannalu Inatsisartuni apriilip ulluisa 20-anni aappassaaneerneqassalluni.
