Nunatsinni tamarmi imigassamik inerteqquteqarneq atuukkunnaassasoq
Kommuneqarfik Sermersuumi, Kommune Qeqertalimmi Kommune Kujallermilu najugaqaruit pisiniarfinni, imerniartarfinni neriniartarfinnilu sisamanngorpamit imigassarsisinnaaleqqissaatit.
Imigassamik inerteqquteqarneq sapaatit akunnerisa marluk matuma siorna atulersinneqartoq sivitsorneqassanngilaq.
Kommune Qeqertalimmi borgmesteri, Ane Hansen (IA) ilaatigut taama oqarpoq:
- Aasianni Qasigiannguanilu imigassamik inerteqquteqarnikkut tuniluunneq annikinnerulermat imigassamik inerteqquteqarneq sivitsussanngilarput. Kangaatsiamili tunilunnneq annertuvoq, imigassamillu inerteqquteqarnissaq innuttaasut kissaatigippassuk kommunip tassa imigassamik inerteqquteqarnerup sivitsornissaa aalajangiiffigissavaa.
Kommune Kujallermit assingusumik aamma nalunaaruteqartoqarpoq:
- Politiit peqqinnissaqarfillu tusarniaaffigaagut, tunilunnerli annikillingaarmat imigassamik nioqquteqarnerup ammaqqinnissaanut piareersimapput. Taaamaammat imigassamik nioqquteqarnermik matoqqatitsinermut sivitsuinissamut pissutissaqanngilagut, Kommune Kujallermi borgmesterip tullia, Naja Lund (IA) oqarpoq.
Nunatsinni killilersuutit – Naatsumik
- Nunatsinni tamarmi tamanit iserfigineqarsinnaasuni coronapas februaarip ulluisa sisamaannit atuukkunnaarpoq..
- Ukununnga isissaguit qanermut assiaquteqassaatit:
- …Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- …Bussinut taxanullu ilaanermi.
- Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
- Tunumi coronapas, qanermut assiaqut ininilu inuit isersinnaasut killilerneqarnerat atorunnaarsinneqarpoq.
- Imigassamik nioqquteqarneq nunatsinni kommuninit tallimanit sisamani februaarip aallaqqaataanut imaluunniit ulluisa qulingiluaannut inerteqqutaagallarpoq.
Danmarkimit angalasut - Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Inerteqquteqarneq aqagu februaarip ulluisa qulingiluaanni nalunaaqutaq unnuap qeqqanut atorunnaartussaavoq.
Imigassamik inerteqquteqarneq innuttaasunut qasukkaatitsisussaasut
Imigassamik inerteqquteqarneq Covid-19-imik tuniluuttoqarneranik annikillisaaniarneq pissutigalugu atulersinneqarpoq. Tamannali kommunini angerlarsimaffinni imigassamik atuinerup eqquinerlunneranik aamma pissuteqarpoq.
- Angerlarsimaffimmi imernerulerneq meeqqanut aamma ilaqutariinnut kisimi eqquinngilaq, Covid-19-imilli tunillaassuisinnaaneq annerulersippaa, imigassartortillunimi tunilllaassuisinnaaneq equmaffigineqarnera annikillisarmat inuillu qaninnerulertarmata, Naalakkersuisut imigassamik inerteqquteqarnerup atulersinneqarneranik januaarip ulluisa 25-anni nalunaarnerminni oqarput.
AAMMA ATUARUK Politimesteri imigassanik matusineq pillugu: Akissarsisoqarnissaa ernummatigaarput
Kalaallit Nunaanni Politiit inerteqquteqarnissaq aamma innersuussutigaat, taakkumi peqqinnissaqarfinni politiinilu corona pissutigalugu sulinngitsorpassuaqarnera sulianik angummassinnaajunnaarnermik kinguneqarsinnaasoq ernumassutigaat.
Inerteqquteqarneq januaarip ulluisa 26-anni atulersinneqarpoq. Tamanna qaammammusisoqarnissaanut, feeriarnermorsisoqarnissaanut soraarnerusutisisoqarnissaanullu tallimanngorneq sioqqullugu pivoq. Sapaatip akunnerata naanera taanna politiit ulappuffigingaatsiartaraluarpaat.
Politimesterillu Bjørn Tegner Bayip oqarnera naapertorlugu imigassamik inerteqquteqarneq iluaqutaasimavoq. Tamanna sisamanngormat kingullermik tusagassiortunik katersortitsinermi oqaatigaa.
- Pisarnermit ulapputeqannginneroqaagut. Angerlasimaffinni eqqissiviilliornerit nuna tamakkerlugu quliupput. Imigassamillu aalakoornartulimmik imigassartorfiusunut attuumassuteqartut suliagut ikinnerujussuupput.
Qeqqata Kommuniani inerteqquteqarnerit marluk
Nuummi coronamik tuniluunneq pissutigalugu imigassamik inerteqquteqarallarneq 2020-mi apriilimi aamma atuunnikuuvoq. Taamani angerlarsimaffinni erngunnerit coronamik tuniluuttoqarneranik kinguneqartartut, tamannalu meeqqanut kingunerluuteqartartoq tunngavilersuutigigineqarpoq.
Tamatuma kingorna Qeqqata Kommunia imigassamik nioqquteqarnermut aamma inerteqquteqarallarpoq. Maannakkut inerteqquteqarnerup saniatigut aasaq aamma inerteqqutigineqarpoq.