Danskit ammip qalipaataanik immikkoortitsineq pillugu iliuusissatut pilersaarutaat suli kinguaattooqqasoq
Danskit ammip qalipaataanik immikkoortitsineq pillugu iliuusissatut pilersaarutaat suli piariinngilaq.
Iliuusissatut pilersaarut aasartinnagu piareereertussaagaluarpoq, taannali ukiut marluk ingerlanerani aappassaanik kinguartinneqarpoq.
Folketingimut ilaasortap, Inuit Ataqatigiinneersup, Aaja Chemnitzip tamanna “akuersaarneqarsinnaanngilluinnarnerarpaa”.
- Pingaarnerutitsinnginnermut tamanna ersarissumik takussutissaavoq, taanna oqarpoq.
Danmarkimi politikerit amerlanerussuteqartut ammip qalipaataanik immikkoortitsineq pillugu iliuusissatut pilersaarusiortoqarnissaa aamma ammip qalipaataanik immikkoortitsinermik akiuiniarnissamut nutaanik suliniuteqartoqarnissaa 2022-mi januaarimi isumaqatigiissutigaat. Taanna 2023-mi saqqummiunneqartussaagaluarpoq.
Danskit nunani allamiunut ilanngutititsinermullu ministeriata, Kaare Dybvad Bekip (S) kinguaattoorneq foketingimut qinersisoqarsimaneranik aamma iliuusissatut pilersaarummut akisussaaffiup ministereqarfimmut allamut nuutsinneqarneranik peqquteqarnerarpaa.
Iliuusissatut pilersaarut kalaallinut tunngatillugu immikkut ittumik ilaatigut immikkoortoqartussaavoq. Kalaallimmi Danmarkimi immikkut ittumik pisinnaatitaaffeqarput – ilaatigut kalaallisut oqaatsit kulturilu pisinnaatitaaffigalugit.
- Misissuinerpassuit kalaallit Danmarkimi assigiinngisitsiffigineqarnermik ammillu qalipaataanik immikkoortitsiffigineqarnermik misigisarnerannik takutitsipput. Isumaginninnermi suliassaqarfimmi pingaartumillu suliffeqarnermi kalaallit danskiniit nalinginnaasumik ikinneruffianni. Danskit naalagaaffiata ilungersuussinissaa pingaaruteqarpoq, Aaja Chemnitz oqarpoq.
Ilinniartitsineruneq aamma naligiissitaaneq pillugu aalajangiisartut
Kalaallit Nunaat pillugu ataatsimiititaliap Alternativet peqatigalugu nunani allamiunut ilanngutititsinissamullu ministeri Kaare Dybvad Bek suliamut atatillugu isumasioqatigiinnissamut aggersarpaat.
Ministerip iliuusissatut pilersaarut aasami sulinngiffeqarfiulertinnagu piareernissaa naatsorsuutigalugu tassani oqaatigaa, sulili piariinngilaq.
- Ammip qalipaataanik immikkoortitsineq pillugu iliuusissatut pilersaarusiornitsinni suliaqangaatsiareerpugut, kisianni suli naammassivinngilaq. Tamanna nammineq soorunami uggoraara, kisianni aasaanerani sulinngiffeqareernerup kingorna suliareqqilernissaa qilanaarutigaara, Kaare Dybvad Bak allakkatigut akissuteqarluni DR-imut allappoq.
Tamatuma saniatigut kalaallit peqatigiiffii amerlanerusut iliuusissatut pilersaarummut ilanngunneqarnissaa ujartorpaa. Kalaallit Københavnimi illuutaat maannamut ilanngutitinneqareerpoq.
Kalaallinummi assigiinngisitsisoqarunnaarnissaanut ammillu qalipaataa malillugu immikkoortitsisoqarunnaarnissaanut nutaanik suliniuteqartoqarnissaa pisariaqarpoq. Suliniut iliuusissatut pilersaarutip pisussaaffigigaa, taanna isumaqarpoq.
- Danmarkimi meeqqat atuarfiini Kalaallit Nunaat pillugu atuartitsisoqarnerulernissaa ilaatigut kissaatigaara. Tamatuma saniatigut assigiinngisitsinermik nalaassisaanni suliamik ilungersuussisinnaasumik naligiissitaaneq pillugu aalajangiisartoqalernissaa aamma kissaatigaara, taanna oqarpoq.
