Angallannermi silaannarmik mingutsitsineq: Peqqissutsimut akornutaasoq politikerip iliuuseqarfigerusukkaa

Angallassissutit motoorillit silaannarmik mingutsitsisarnerat peqqissutsimut kinguneqarnerlusinnaasoq qularnannngilaq. Kommuneqarfik Sermersuumilu politikeri aaqqiissutissamik siunnersuutissaqarpoq: Angallassissutinut motoorilinnut nutaanut akitsuut peerneqarli.

Allattoq Markus Valentin

decembarip 20-at 2024 10:59

Nunatsinni angallassissutit motoorillit silaannarmik mingutsitsigaangata peqqissutsimut kingunerlunissaa navianaateqartarpoq.

Tamanna avatangiisinut ingeniørip aamma silaannarmut mingutsitsinermut immikkut ilisimasaqartup Kåre Press-Kristensenip uppernarsaqqammerpaa.

Biilillu orsussartortut sorujuiaateqalertariaqarnerat taassuma siunnersuutigaa.

Justus Hansen (D) Kommuneqarfik Sermersuumi illoqarfimmik ineriartortitsinermut sanaartornermullu ataatsimiititaliami siulittaasuuvoq.

Aamma atuaruk Aqqusinermi angallanneq: Silaannaq ersinngitsumik toqunartuuvoq, aaqqiissutissarli ajornaatsuuvoq

Peqqissutsimullu kingunipiluutaasinnaasut taassuma eqqarsaatigai:

- Soorunami eqqarsalersitsivoq. Uanga nammineq biililerisutoqaavunga sorujuiaatillu qanoq pingaaruteqartiginerat ilisimavara.

Ajornartorsiulli imaaliallaannarluni aaqqinneqarsinnaanngitsoq politikeri oqarpoq.

Taamaattumik politikerit aaqqiissuteqartariaqartut Justus Hansen isumaqarpoq – soorlu angallassissutinut motoorilinnut nutaanut akitsuutip peerneqavinnissaa.

- Mingutitsineq malunnaatilimmik annikillisinneqassappat akitsuummik appartitsineq akitsuuteqarunnaartitsivinnerluunniit periarfissaapput siulliit.

Mingutitsineq nakkutigineqanngitsoq

Danmarkimi biilit nutaat tamarmik orsussamik ingerlatillit sorujuiaateqarnissaat 2011-mili piumasaqaataalerpoq.

Biilillillu tamarmik biilitik ukioq allorlugu misissortittassavaat. Biilittaaq avatangiisinik mingutitsinnginnerpaamik ingerlataasinnaanerat peqqissutsimullu navianaatikinnerpaanissaat qulakkeerniarlugu ilaatigut misissorneqartarput.

Nunatsinnili angallassissutit motoorillit pioreersut orsussamik ingerlatillit sorujuiaateqarnissaannik piumasaqaateqarneq aaqqiissutaanavianngitsoq, Justus Hansen oqarpoq.

- Taama piumasaqaateqalerneq illoqarfinni nunaqarfinnilu ilungersunartorujussuussaaq, tassami biiliutillit imaluunniit sanaartortussarsiortut allalluunniit aningaasartuuteqangaatsialertussaapput, Justus Hansen oqarpoq.

NUNATSINNI ORSUSSAMIK INGERLATILINNUT SORUJUIAAT

Orsussamik ingerlatilinnut sorujuiaat biilit pujoorfiiniittarpoq orsussallu dieselip ingerlatitut atorneqarnerani paamik katersuiviuvoq.

Biilit akunnermut 100 kilometeripajaatut sukkatigisumik ingerlaneranni motoori kissakkaangat paaq sorujuiaammi katersorneqartoq ikummartarpoq, taamaammallu biilip sorujuiaataa nammineerluni salittarluni.

Akuerisaasumilli ingerlalluni sukkassuseq akunnermut 60 kilometerit qaangerneqajuimmat sorujuiaat ukiup affakkaartumik ukiumulluunniit ataasiarluni salinneqartassaaq.

Danmarkimi biiliutillit biilitik ukioq allortarlugu misissortittassavaat, ilaatigut sorujuiaat salinneqassalluni. Nunatsinnili biilinik 1999-imili misissuisoqarmat suli misissuisoqaqqinngilaq.

Orsussalli imerpalasumik saliisartumik akuneqarsinnaanissaa akuerineqarsinnaavoq, taamaalilluni paap qaqugu ikummarnissaanut killissaq appartinneqarsinnaammat. Tassa imaappoq orsussap sorujuiaammi katersuussimasup ikummarnissaanut pujoorfik kissarujussuartariaqarani.

Paasissutissarsiffik: Autobutler.dk

Allisiguk

Naak biililinnut ataasiakkaanut akisusinnaagaluartoq, kisianni peqqissutsimut taama navianarsinnaatigippat sorujuiaateqarnissamik piumaqateqarnissaq pisariaqassanngila?

- Inuiaqatigiit pitsaanerpaamik siuariartortinneqarnissaat politikerit siullertut akisussaaffigaat. Aappaattut sanaartortussarsiortut inuiaqatigiillu inissaannik sanaartortartut lastbiilitik taarsissagunikkit, taava kvadratmeterimut akia qaffanneqartariaqassaaq. Taamaammat politikerit sussanerlutik nalilersortariaqarpaat.

- Imaannaassanngeqaaq, sugaluaraanniluunniilli arlaatigut ataqatigiipput.

Akitsuummik appaaneq

Nutaanilli biilitaarnermi akitsuutinik appaasoqartariaqartoq, Justus Hansen isumaqarpoq, taamaalilluni amerlanerusut akissaqassammata biilitoqqatillu nutaanik avatangiisinillu mingutitsinnginnerusunik sorujuiaatitaqareersunik imaluunniit innaallagiartortunik taarserusulissammatigit.

- Ajornartorsiutip aallaavia eqqarsaatigineqartariaqarpoq. Tassa angallassissutit motoorillit nutaanik taarsiinnariaanngillat, akisoqaammi.

- Aningaasatigut iluanaarutaasinnaasariaqarpoq. Biilimmi innaallagiaq orsussarlu akuleriisillugit ingerlasinnaasut aamma innaallagiartortut akitsuutikinnerpaanissaat akuersissutigineqareerpoq. Sanasussarsiortartulli maskiinaataat biiliilu dieselitortut uani mingutsitsinerpaasut aaqqiiffigineqarnissaat ajornarneruvoq.

Ilissimi aamma kommunitut akisussaaffeqassaasi?

- Akisussaafferujussuaqarpugut, Justus Hansen oqarpoq.

- Tromsømiit tikeraarteqaqqammerpugut. Taakku tappavani sanasussarsiortartut angallassissutaat orsussamik ingerlatillit illoqarfiup qeqqani inerteqqutigaat. Assaassuillu innaallagiartortut allallu assingusut illoqarfiup qeqqani atorneqartarput. Taanna aamma periarfissaavoq. Aningaasaqarnerulli sanasussarsiortartullu ataasiakkaat imminnut ataqatigiinnerat tassani apeqqutaaqqippoq.

Nutaarsiassami kukkunermik nassaarsimaguit uunga allaffigineqarsinnaavugut.