Politikki

EU-p puisit amii pillugit paasititsiniaanera danskit politikeriinit isornartorsiorneqartoq

Puisit amiisa EU-mut tuniniarneqarsinnaanissaannut atatillugu EU-kommissionip paasititsiniaanera Danmark sinnerlugu EU-parlamentimut ilaasortanit assigiinngitsunit isornartorsiorneqarpoq.

Allattoq Helle Nørrelund Sørensen

februaarip 01-at 2016 11:42

Nutserisoq Mads Lynge

Paasititsiniaaneq atuisunut anngunneq ajorpoq, isornartorsiuisut oqarput:

- Atorsinnaanngilluinnarpoq. Partii Venstre sinnerlugu EU-parlamentimut ilaasortaq Ulla Tørnæs taama oqarpoq.

EU-p parlamentiani ilaasortat Christel Schaldemose Socialdemokraatineersoq aamma Bendt Bendtsen De Konservativeneersoq peqatigalugit naggueqatigiit Inuit puisit amiinik tunisassiaannut tunngatillugu EU-kommissionip paasititsinissanissamik pisussaaffileqarsimanera isornartorsiorpaa.

Naggueqatigiit Inuit puisinniartarnerannut tunngasumik EU-kommissioni paasititsiniaanissamut siorna pisussaaffilerneqarpoq, naggueqatigiit Inuit piujuaannartitsinissaq aallaavigalugu puisinniartarnerat paasititsiniutigissallugu EU-kommissioni pisussaaffilerneqarluni. Kommissionip politikerinut taakkununnga pingasunut akissuteqaataani tamanna atuarneqarsinnaavoq.

Aamma atuaruk Kalaallit puisit amiinik EU-mut tunisisinnaanerat atuutiinnassaaq

Aamma atuaruk Kruse: Puisit amii pillugit EU-mi nutaamik paasisitsiniaasoqassaaq

Naggueqatigiilli Inuit puisit amiinik EU-mut eqqusseqqusinnginnermut ilaatinneqannginnissaat EU-kommissionip nittartagaatigut taamaallaat allaaserineqarnera naammanngitsoq Ulla Tørnæs isumaqarpoq:

- Nittartakkap paasissutissanik nutaanik ilaartorneqartarnera paasititsiniaanivittut taaneqarsinnaanersoq apeqquserusuppara. Paasissutissanimmi nammineq ujarlertoqartariaqarpoq. Paasititsiniaasoqarnissaa siorna oqallisigigatsigu isumaqaraluarpunga avammut ammasumik paasititsiniaasoqassasoq, paatsuunganarsinnaasut ersarissarneqarnissaat siunniunneqarluni, Ulla Tørnæs oqarpoq.

Danmark sinnerlugu E-parlamentimut ilaasortat arlallit taamaammat EU-kommissionimut apeqquteqaateqarput, EU-kommissionip nittartagaanut qassit isertarnersut, aningaasallu paasititsiniaanermut atorneqartartut qassiunersut ilaatigut paasiniarneqarluni.

Aamma atuaruk Kim Kielsenip puisinniartartut tapersersorusuppai

Aamma atuaruk VIDEO Puisit amiisa suliarineqartarnerat KNAPK-p pitsaanerulersikkusuppaa

Naallu EU-kommissioni apeqquteqaatinut akissuteqarnikuugaluartoq, Ulla Tørnæs isumaqarpoq EU-kommissionip neriorsuutigineqaraluartutut suliassani naammassisinnaanngikkai:

- Ersarilluinnaraluarpugut. Allannguutissatut siunnersuutini ersarissarparput, aamma EU-kommissionimik ataatsimeeqateqarnitsinni. EU-parlamentip suna piumasarineraa ersarilluinnaraluarpoq, partii Venstre sinnerlugu EU-parlamentimi ilaasortaq Ulla Tørnæs oqarpoq.

Puisit amiinut tunngasunik EU-kommissionip paasititsiniaanissaa EU-parlamentimi oqaluuserineqaqqissanersoq, EU-kommissionip akissutigisassaasa saniatigut Danmarkip EU-parlamentimut ilaasortaatitaasa ilaat maanna eqqarsaatersuutigaat.