Kim Kielsenip puisinniartartut tapersersorusuppai
Naalakkersuisut siulittaasuat taama neriorsuivoq Folketingimut ilaasortap, Aaja Chemnitz Larsenip ippassaq KNR-imut oqaatigereeraalu, Europami paasisitsiniaaneq Danmarkimiit, EU-miit Kaalaallit Nunaanniilluunniit suli aningaasaliiffigineqanngitsoq.
- Tusakkakka malillugu tamanna suli aningaasaliiffigineqanngilaq. Inuit eqqorneqannginnissaat pillugu inatsisiliortoqarpoq tamannali kikkunnilluunniit suli ilisimaneqanngilaq tassami oqartoqarsinnaavoq immikkut inatsiseqalerneq suli atuutsinneqalinngitsoq, tamannalu assut unammillernartuussaaq, Aaja Chemnitz Larsen KNR-imut oqarpoq.
Aningaasanut Inatsimmit aningaasalersorneqarnissaat ujartorneqassaaq
Naalakkersuisut siulittaasuata Nunani Avannarlerni ministeriunerit ulluni makkunani naapeqatiginerat iluatsillugu taanna oqarpoq, paasisitsiniaanerup ingerlanneqarnissaa pillugu Aningaasanut Inatsimmit tamassuma aningaasaliiffigineqarnissaa misissorniarlugu.
- Periarfissat assigiinngitsut atorlugit suliat ingerlapput. Aamma Inuit Silamut tunngatillugu, tamanna Aningaasanut Inatsisissami qanutut tamassuma aaqqiivigineqarnissaa ujartuiffigineqarsinnaavoq.
- Tamassuma aningaasaliiffigineqarnissaa pillugu maanna neriorsuisinnaavit?
- Naamik neriorsuinianngilanga, taamatut oqareersinnaavunga. Kisianni tamanna pillugu aaqqiissutissanik ujartueqataasariarpugut.
Paasisitsiniaanerit allat Nunanit Avannarlernit aningaasalersorneqarput
Naalakkersuisut siulittaasuat, Kim Kielsen KNR-imut ullumi taama oqarpoq. Aamma oqarluni eqqaamaqqullugu, paasisitsiniaanerit allat Nunat Avannarlernit aningaasalersorneqareersut, soorlu Nunatta pissarirtitaannik atorluaanissat eqqarsaatigalugit. Kim Kielsenip ilaatigut taava, qeqqussanik tunisassiornermik qanittukkut aallarniisoq aningaasanik taperneqartoq.
- Imaappoq pisuussutitsinnut tunngatillugu atorluaanissaq aamma avammut tamassuma nittarsaannissaanut atatillugu assigiinngitsunut atugassanik Nunat Avannarliit aningaasalinikuusimapput.
Naalakkersuisut siulittaasuat, Kim Kielsen taama KNR-imut ullumi oqarpoq.