Kruse: Puisit amii pillugit EU-mi nutaamik paasisitsiniaasoqassaaq

Paasisitsiniaanerli tamanna iluamik sunniuteqarsimanngitsoq, piniarnermut naalakkersuisoq, Karl-Kristian Kruse oqarpoq. Maannalu pilersaarutigilerlugu nutaamik pitsaanerusumillu paasisitsiniaanissaq.

- Ukiuni kingullerni qaammarsaaneq annertuumik ingerlanneqaraluartoq, taamaattoq Nunatsinni puisinniartarneq pillugu EU-mi inuppassuarnit annertunerusumik ilisimaneqanngitsoq paasivarput allaat EU-p inatsisartuini ilaasortanit.

Piniarnermut, aalisarnermut nunalerinermullu naalakkersuisoq, Karl-Kristian Kruse oqarpoq.

Aamma atuaruk Inuit Silap puisit pillugit paasititsiniaanera sammineqarluartoq

Naalakkersuisup erseqqissarpaa, Inuit Sila qaammarsaaneri paasisitsiniaanerilu ajorineqanngimmat, taamaattorli paasisitsiniaanermik sukumiinerusumik naalakkersuisut pilersaaruteqartut oqarluni.

- Bruxellesimiinnitsinni paasivarput puisit amii pillugit EU-mi politikerinit tamanna ilisimaneqanngivissortoq naak paasisitsiniaanerit pitsaasumik ingerlanneqarsimagaluartut. Taamaattumik pingaaruteqarpoq nutaamik qaammarsaanermik pisariaqartitsisoqartoq, Karl-Kristian Kruse oqarpoq.

Aamma atuaruk Kalaallit puisit amiinik EU-mut tunisisinnaanerat atuutiinnassaaq

Tassalu puisit amii pillugu qaammarsaaneq EU-mi inatisartunut sammitinneqarnerusoq, Naalakkersuisunit pilersaarutigineqalersoq, Karl-Kristian Kruse oqarpoq.

- EU-p inatsisartuini ilaasortat allangorartarput allatuulli. Taamaattumik taakkununnga qaammarsaaneq ataavartoq pingaaruteqartorujussuuvoq.

Piniarnermut, aalisarnermut nunalerinermullu naalakkersuisoq, Karl-Kristian Kruse oqarpoq.

Puisit amiisa EU-mut eqquteqqusaajunnaarnerani issittumi inuit tamassuminnga eqqarneqannginnissaat, EU-mi politikerinit aalajangiiffigineqareermat, paasisitsiniaanissaq kingulleq EU-mit aningaasaliiffigineqartussaassasoq, naalakkersuisunit eqqarsaatigineqarpoq