VIDEO Puisit amiisa suliarineqartarnerat KNAPK-p pitsaanerulersikkusuppaa
- Soorunami taamaattoqarnera nuannerpoq, aamma puisit amiinik nioqquteqarnitta ingerlaannarsinnaanera matumani qulakkeerneqarpoq, Henrik Sandgreen KNR-imut taama oqarpoq.
Naggueqatigiit Inuit immikkut pineqarnerisa attatiinnarneqarnissaa amerlanerussuteqarluartut, tassalu 631-it akuersissutigaat 31-nnaallu itigartitsillutik, tamannalu pivoq Nunatta Danmarkillu tungaanit annertuumik suliniuteqartoqareersoq.
Aamma atuaruk Kalaallit puisit amiinik EU-mut tunisisinnaanerat atuutiinnassaaq
Tamannali puisit amiinik avammut nioqquteqarnerup annertuserujussuarneranik kinguneqassagunanngilaq. Pitsanngorsagassat arlaqartut KNAPK-p siulittaasua isumaqarpoq.
- Anguniagassaavoq, kisianni aamma imaannaanngitsupilussuussaaq taassuma anguniarnissaa. Kisianni taamaakkaluartoq pisariaqartorujussuuvoq, Henrik Sandgreen taama oqarpoq.
Puisit amiisa pitsaassuusaannik qaffassaanikkut unammillersinnaassutsip qaffassarneqarnissaa KNAPK-p suliniuteqarfiginiarpaa.
- Naammanngilaq aamma puisi ameeraanni amialu tunniukkaanni. Pitsaassutsimik avammut niuernikkut unammillersinnaassutsikkut pitsaassutsimik aaqqiissuussiniarnitsinni maani nunatsinni kinguussaariartulernerput taanna massakkut annertunerusumik suliniarfigineqartariaqalerpoq.
- Ja, ammit ajunngillat, aamma ajunngitsorpassuaqarpoq, kisianni taakkua akornanni amerlavallaarujorujorussuarput pitsaanerusumik inissisimasinnaagaluartut ajornerusumik inissisimasut, Henrik Sandgreen taama oqarpoq.
Aamma atuaruk EU-mi isumaqatigiinniarnerit Great Greenlandimut pingaaruteqartut
Naggueqatigiit Inuit immikkut pineqarnerisa attatiinnarneqarnissaanik akuersissuteqarnerup peqatigisaanik, puisit amiinik Sverigemit Finlandimiillu eqqussuinermut malittarisassat sukarteriffigineqarput. Nunat taakku marluk puiseqassuseq annikillisarniarlugu pisanit amernik nioqquteqarsinnaagaluarput. Maannali taamaaliorsinnaajunnaarput, taamaalillunilu niuerfimmi unammillertigineqartut aamma ikilillutik.
