EU-mi isumaqatigiinniarnerit Great Greenlandimut pingaaruteqartut
Taamaattumik puisit amiinik tunisassiorfiup pisut qanittumik malinnaaffigai.
- Puisit amii pillugit EU-mi isumaqatigiinniarnerit maannakkorpiaq ingerlanneqartut arlaqartut takusinnaavagut. Puisit amiinik siunissami Europamut tunisaqarsinnaassagutta isumaqatigiinniarnerit iluatsinnissaat uatsinnut pingaaruteqarpoq, Lars Berg Great Greenlandimi pisortaasoq oqarpoq.
AAMMA ATUARUK Inuit Silap puisit pillugit paasititsiniaanera sammineqarluartoq
Sukaterinissaq akuerineqassappat, suliffeqarfimmut kinguneqarnerliorsinnaavoq. Taamaattumik inernissaa Lars Bergip pissangangivaa.
- Maannakkut siusippallaarpoq oqaatigissallugu kingunissaa qanoq ikkumaarnersoq. Soorunami allannguigaanni, soorlu 2008-mi 2009-milu taama pisoqartoq, taava pisisartutsinni atuisartutsinnilu uiverneqalersinnaavoq, puisit amii inerteqqutaanersut ingerteqqutaannginnersulluunniit. Tamannalu soorunami uatsinnut pinngitsoorusunnaqaaq, Lars Berg oqarpoq.
EU'p Nunap iluani niuvernermut Atuisartullu illersorneqarnissaannut ataatsimiititaliaani puisit amii sisamanngorpat juunip sisamaanni eqqartorneqassapput.
Tassani EU parlamentip taasissutigisassaa, allannguutissap oqaasertassai isumaqatigiissutigissavaat. Taanna kingorna oktobarimi EU-kommissionimi inernerusumik taasissutigineqassaaq.
AAMMA ATUARUK Krusep piniartut eqqugaasinnaanerat ernumagigaa
Allannguutissatut missingersuummi takuneqarsinnaavoq, Inuit allallu nunap inoqqaavi puisit amiinik taamaallaat nioqquteqarsinnaasut, puisi naalliutsinneqarani toqunneqarsimappat, aammalu puisit amiinik tunisassiat annertussusaasa inuiaqatigiit namminneq atortagaat qaangissanngippatigit.
Missingersuummi nutaanerpaami erseqqissarusunneqarsimavoq, puisinniarneq tassaammat inuit inuuginnarnissaminnut tunngaviat, aammalu assersuutigalugu Kalaallit Nunaat puisit amiinik EU-mi ilaasortanut tuniniaanikkut iluanaarniarsinnaatitaassasoq.
Missingersuummi oqaasertaq sorleq toqqarneqassanersoq Nunatta puisit amiinik niuverneranut assorsuaq sunniuteqarsinnaavoq.
