Krusep piniartut eqqugaasinnaanerat ernumagigaa

"Naggueqatigiit Inuit ilaatinneqannginnerat"-nut inatsimmut EU allannguiniarsarilermat, Karl-Kristian Kruse Bruxellesimi inatsisip allanngortinneqannginnissaa anguniarlugu sunniiniariaqqammerpoq.
apriilip 21-at 2015 09:42

Puisi piniartunit aatsaat pisarineqassaaq neqaa nerineqassappat, taamaanngippat nunanut EU-mut ilaasortanut tunineqarsinnaassanngilaq. Aammalu piniartut puisi piniagartik anniartissaanngilaat, annilaartinneqassanngilaq imaluunniit puisi ersiortinneqassananni.  EU-p ilaatigut piumasaqaatai taakkuupput.

Europamiut Nunarput pillugu ilisimasakittut

Aalisarnermut piniarnermullu naalakkersuisoq, Karl-Kristian Kruse, puisit amiinik Nunarput avammut tunisisinnaajunnaarataassasoralugu ernumanerarpoq.

- Ataatsimut eqikkarlugu, tappavaniinnitsinni paasissutissat tunniuteriikkatta malitsigisaanik nunarsuarmioqatitsinnut Nunatsinni puisinniartarneq pillugu qaammarsaasariaqarneq avaqqunneqarsinnaanngitsoq maluginiagassaavoq. Tassa EU-mi nunat ilaasortat 28-t iluani millionilikkaanik inulimmi Nunatsinni pissutsinik ilisimasaqarneq suli killilerujussuusoq paasinarami, Karl-Kristian Kruse KNR-mut oqarpoq.

Karl Kristian Krusep Nunatsinni piniartut piniariaasiat pillugu oqalugiarami soqutiginnittut tapersersuisullu amerlasimasut maluginiarsimavaa.

Karl-Kristian Kruse KNAPK-miillu aallartitat marluk angalanerminni, isiginnaagassiaaraq nunatsinni piniartuunerup silarsuuanik paasissutissiissoq, minutsinik tallimanik sivisussuseqartoq, ataatsimiinnerni takutinneqartoq isiginnaartunit nuannarineqarluarsimasoq, Karl Kristian Krusep oqaatigaa.

Naalakkersuisoq ernumasoq

Uumasunut illersuiniaqatigiilli ataatsimiinnerni oqariartuutimikkut sakkortunerat, malitsigisaanillu ataatsimeeqataasunik isumaqatigineqartuarnerat, Karl Kristian Krusep ernumanartoqartinnerarpaa.

- Neriuppunga Nunatsinni pineqartumi naggueqatigiit Inuit ilaatinneqannginnerannut tunngasoq attanneqarsinnaassasoq. Taannalu pissanngippat Nunatsinni puisinniartarneq ukioorpaalussui matuma siornatigut annertuumik eqqornerlunneqarnikuuvoq, taamatullu eqqorneqaqqissinnaanerput aarleqqutissaavoq, Karl Kristian Kruse naggasiivoq.