Danskit naalakkersuisui: Danmarkip illersornissamut umiarsuit nutaat nammineq sanaartussavai
Illersornissaqarfimmut matumani aamma Kalaallit Nunaannut Savalimmiunullu umiarsuit sorsuutit nutaat Danmarkimi umiarsualiorfinnit sananeqassapput.
Danmarkimi naalakkersuisut danskit nalunaaqutaat naapertorlugu marlunngornermi ullaap tungaani tusagassiortunik katersortitsinermi oqarput. Umiarsuit sorsuutit Danmarkimi sananeqarnerisigut Danmarkip nunat allat isumallluutigisariaqassanngilai, suliffissaqartitsiniarnermullu aamma iluaqutaassalluni.
Umiarsuilli sorsuutit timitaat nunani allani ukiut kingulliit 20-t ingerlaneranni sananeqartarsimapput.
Imarsiornermili suleqatigiit nalunaarusiaanni umiarsualiorfiit pingasut umiarsuarnik sorsuutinik sanasinnaasussatut piukkunneqartut atuarneqarsinnaavoq.
Umiarsualiorsinnaasutulli ilinniagaqarsimasunik naammattunik Danmark peqanngitsoq, Danmarkip ilinniartitaanermut ilisimatusarnermullu ministeriata Christina Egelundip tusagassiortunik katersortitsinermi nassuerutigaa.
- Ilinniartitaanermi suliassaqartugut qularutissaanngilaq. Umiarsuarnik nutaanik sanaartortoqarnissaanut inunnik amerlanerusunik sanaartorsinnaasunik aamma ilinniartitsissaagut, tamannalu sulissutigissavarput.
Umiarsualiorfimmi pisortaq: Pilersaarut piviusorsiunngilaq
Umiarsuilli sorsuutit Danmarkimi sanaartorneqassappata tamanna sivisunaarneqaratarsinnaasoq umiarsualiorfinnit ernumassutigineqarpoq.
Kent Damgård, Danmarkimi umiarsualiorfiit annersaanni Karstensens Skibsværftimi, Skagenimiittumi pisortaq, umiarsuit sorsuutit Danmarkimi sananeqarnissaat pillugu TV2-mut ima oqarpoq:
- Umiarsuit sorsuutit Danmarkimi tamakkiisumik siunissami sananeqarnissaannut takorluugaqarluni ajunngilaq. Umiarsuilli Danmarkimi tamakkiisumik sananeqarnissaat piviusorsiornerunersoq apeqquserneqartariaqarpoq. Piviusorsiornerunngilaq.
Isumaqatigiissutip ilaani kingullermi isumaqatigiissutip immikkoortuata aappaani, Christiansborgimi partiit kiisalu nunatsinni naalakkersuisut Savalimmiunilu naalakkersuisut illersornissamut isumaqatigiissutaani illersornissamut umairsuarnik nutaanik pisinissamut aningaasaliisoqarnissaat isumaqatigiissutigaat.
Umiarsuup sorsuutip Danmarkimi sananeqarsimasup siulliup siusinnerpaamik 2028-mi naammassineqarsinnaanissaa, imarsiornermi suleqatigiiffiup siulittaasuata, Anne H. Steffensenipn tusagassiortunik katersortitsinermi nalilerpaa.
