Naalakkersuisut umiarsuarnik nutaanik piumasaqartut - Illersornissamut ministeri umiarsuit aningaasassarsiuunnissaannik neriorsuuteqartoq

Danskit illersornissamut ministeriat, Troels Lund Poulsen (V) ataasinngormalli nunatsinniippoq.

Illersornissaqarfiup Issittumi umiarsuai alapernaarsuutit nutaajunerpaat umiarsualivimmi uninngaannartut tamaaniinnermini takuai.

Umiarsuit soorlu annaassiniarnermut, aalisarnermik nakkutilliinermut naalagaaaffeqatigiit oqartussaanerannik illersuinermut atortussaagaluarput. Umiarsuarnili marlunni motoorit tapertaasut ajoquteqarmata, umiarsuit uninngaannarput.

Inatsisartut nunanut allanut sillimaniarnermullu ataatsimiititaliaanni siulittaasup Marianne Paviasenip tamanna naammaginngilaa. Taanna umiarsuarnut nutaanut nunatta sineriaanik nakkutilliisinnaasunut, pisariaqassappallu illersuisinnaasunut aningaasaliisoqarnissaanik piumasaqarpoq.

Naalakkersuisut danskillu naalakkersuisui umiarsuit pillugit oqaloqatigiittut, nunanut allanut naalaakkersuisoq, Vivian Motzfeldt (S) oqarpoq.

- Umiarsuit suliassaminnik naammassinnissinnaasut soorunami pingaaruteqartupilussuupput. Taamaammat isumaqatigiinninniarnissani tullinnguuttuni umiarsuit ilaapput, oqaloqatiginninnerillu tullinnguuttuni aamma oqaloqatigiissutigineqartussallutik. Ullaaq oqaloqatigiiinnerit aallaartipput, umiarsuillu oqaloqatigiinnerni ilaapput, Vivian Motzfeldt oqarpoq.

Umiarsuit inuiaqatigiinnit iluaqutaasaramik, soorlu annaassiniarnermut atorneqartaramik, pingaaruteqartut, Vivian Motzfeldtip erseqqissaatigaa. Aammali sakkut pingaaruteqarput.

- Siullermik erseqqissaatigissavara, sakkkunik annertusaaneq nunatta saassussinissamut atortussaanngimmagit. Taanna pingaarnerpaamik inissitassaavoq. Kisianni sukkulluunniit imartarujussuatsinni nakkutilliinermi aamma piginnaasagut qaffasissuusariaqarput illersorsinnaasariaqaratta.

Danskit naalakkersuisui aningaasaliinissamut piareersimasut

Umiarsuit Lauge Koch Ejner Mikkelsenilu maanna umiartorfigeqqusaanngillat. Taamaammat Illersornissaqarfik umiarsuarnik pisoqqanik marlunnik Thetisitut ittunik Issittumi Sakkutooqarfiup nunatsinni suliassaanut atortussanik atuutsitsivoq.

Umiarsuulli Thetisitut ittup Tritonimi taaguutillip Nuummut tikeqqammernerani teknikkikkut ajoquteqalerpoq, iluarsartuunneqartariaqalerlunilu.

Umiarsuit ajoquterpassuaqarmata, Issittumi Sakkutooqarfiup suliassani naammassiuminaaatsikkai illersornissamut ministereqarfimmit qulaajaanermi DR-imit pissarsiarineqarsimasumi atuarneqarsinnaavoq.

- Issittumi Sakkutooqarfiup pisussaaffimminik naammassinninissaani unammillernartoqarpoq, DR naapertorlugu allaqqavoq.

Ajutumeernerit umiarsuit arlallit maanna atorsinnaannginnerinut pissutaasut, Troels Lund Poulsen isumaqarpoq. Umiarsuit Knud Rasmussenitut ittut marluk atorunnaarnissamut nutaajuallaarput.

Umiarsuilli alapernaarsuutit Thetisitut ittut atorunnaaariaannaasut, illersornissamut ministeri oqarpoq.

- Umiarsuit Thetisitut ittut ukiorpassuit atugareerput. Umiarsuit taakku sisamat qaqugu taarsissanerigut misissussavarput. Tamanna illersornissaqarfimmut upernaamut nutaanik aningaasaliisussanngorutta oqaluuserissavarput, Troels Lund Poulsen KNR-imut oqarpoq.

Umiarsuit nutaat qaqugu atoriaannanngussanersut, illersornissamut ministerip oqaatiigerusunngilaa. Nunatsinnili atugassaasut erseqqissaatigaa.

- Nunat sorliit Kalaallit Nunaanniinnersut ataatsimut isiginiarnera ilungersunarpoq. Aamma inuiaqatigiinnut tunngasunik ikiuinikkut aaqqiissuteqarfigisassatsinnik suliassaqartarpugut, taanna oqarpoq.