Issittumi sakkutuut umiarsuaat teknikkikkut ajutooqqanerat pissutigalugu umiarsualivimmiittut

Sakkutuut imarsiortut alapersaarsuutaat nutaanerpaat marluk, nunatta imartaani nalinginnaasumik alapernaarsuisartut teknikkikkut ajutooqqanertik pissutigalugu sarfalersorsinnaannginnamik angalasinnaanngillat.

Issittumi Sakkutooqarfik taama nalunaaruteqartoq DR allappoq.

Umiarsuit marluk umiarsuartut Knud Rasmussenitut ittuusut ajutooqqanissaat qaammammik ataatsimik sivisussuseqassangatinneqarpoq. Umiarsuup aappaani sarfalersuut aserorsimavoq, umiarsuullu aappaaniittoq aserungajaqqalluni.

Umiarsuup aappaa ujaasinermut annaassiniarnermullu suli atorneqarsinnaasoq, Issittumi Sakkutooqarfik nalunaaruteqarpoq.

Ajortut naaffeqanngitsut

Illersornissamut politikkikkut aaqqissusaanermi Folk og Sikkerhedimi siulittaasup, Torben Ørting Jørgensenip Illersornissaqarfiup atortorissaarutit periarfissaasut atorlugit tunngaviusumik suliassat ajornakusoortikkai DR-imut oqaatigaa.

- Ajortut naaffeqanngillat.

- Danskit illersornissaqarnerani kisimi oqaasissaqarnerminik malunnartitsinissaa tunngaviuvoq. Tassa Kunngeqarfiup sumit aallartinneranik sumullu killinneranik takutitsineq. Suliassaq tassani suliarineqartoq pingaaruteqarpoq, Sakkutuut imarsiortuini kontreadmineraliusimasoq oqarpoq.

Qamutillit seqqorsinnaanngitsut

Umiarsuit alapernaarsuutip taassuma assinga sakkuani atortumik amigaateqarnera pissutigalugu ukiuni 15-ini seqqorsinnaanngitsumik qamutileqarsimapput.

Umiarsuit alapernaarsuutit Knud Rasmussenitut ittut issittup imartaani nunatta Savalimmiullu eqqaanni Naalagaaffeqatigiinnerup kisimi oqartussaaneranik takutitsinissaq alapernaarsuinissarlu siunertarai.

Taakku qamutillit 76 millimeter M/85 sakkoralugit taamaaliortarput. Qamutilittaalli ukiorpassuarni atorneqarsinnaanatik isigisassaannaasimapput.

Illersornissaqarfik umiarsuarnik sorsuutinik taama ittunik pingasunik peqarpoq. Siulliit marluk 2008-mi 2009-milu atulerneqarput.

Umiarsuit pingajuat nutaanerumaartoq 2016-imi atulerpoq. Taannalu siullernut marlunnut sanilliullugu aallaqqaammullu atorluarnerusinnaasumik qamutilittalerneqarluni sananeqarpoq.