IA-p umiarsuit alapernaarsuutit atorneqarnissamut piareersimanngitsut kamaatigai – nutaanillu piumasaqarluni

Illersornissaqarfiup alapernaarsuutai marluk Nuummi talittarfik februaarip aallaqqaataanili qimanngilaat.

Umiarsuit marluk motoriannut ikiuutit ajortissimapput, taamaammallu angalasinnaajunnaarlutik.

Dr.dk taama allaaserisaqarpoq.

Tamannalu ajornartorsiutaavoq – umiarsuimmi alapernaarsuutit nunatta imartaani nakkutilliisussaapput – taamaammat Danmarkip akisussaaffini kivissinnaanngikkaa, Mariane Paviasen (IA) isumaqarpoq.

Taanna Inatsisartuni Nunanut allanut Sillimaniarnermullu Ataatsimiititaliami siulittaasuuvoq.

- Danskit naalagaaffiata illersornissarput, sillimaniarnikkullu inisisimanissarput akisussaaffigaat, taamaattoq ilumut Danskit naalakkersuisuisa akisussaaffimminnik kivitsisinnaanerat, piumassuseqarnerat nassaariuminaappoq, taanna tusagassiuutinut nalunaarummi allappoq.

Umiarsuarnik qamutilittalinnik nutaanik qujanaq

Taassuma KNR-imut naatsumik oqaaseqarnermini danskit politikerii Issittumi Sakkutooqarfimmut umiarsuarnut nutaanut aningaasassarsiornissaat piumasaraa:

- Umiarsuit pisoqqat ajorput. Taamaammat umiarsuarnut nutaanut aningaasaliinissaq pisariaqarpoq. Umiarsuit qamutilinnik pisariaqarpat seqqorsinnaasunik peqassapput, taanna oqarpoq.

Umiarsuit alapernaarsuutit nunatta imartaata kisimi nakkutilliisussaanngillat. Taakku ajutoortoqarnerani – assersuutigalugu ajunaarsimasunik imaluunniit inunnik imaani maqaasineqartunik ujaasinermut aamma atorneqarsinnaassapput. Taamaammat politiitulli upalungaarsimanermut ilaapput – taamatullu aamma aalisarnermik nakkutilliisarlutik.

Mariane Paviasen (IA) er formand for Udenrigs- og Sikkerhedspolitisk Udvalg i Inatsisartut. Assi © : Privat

Umiarsuit marluk motorianut ikiuutaasunut ajoqutaasoq paasineqartinnagu angalanissamut inerteqquteqarfigineqarluinnartut, DR-ip Illersornissamut ministereqarfimmit allagaatinik takunniffigisaani allassimavoq.

Sumiginnarneqarluta misigisimavugut

Illersornissaqarfiup alapernaarsuutaa alla Tritonimik ateqartoq Nuup tungaanut aallartinneqarpoq – taannali aamma ajorsivoq.

- Tritonip piffissami Nuup avataani uninngalluni iluarsartuunneqarsimanera uppernarsarsinnaavara, Sakkutuut imarsiortut qullersaqarfianni pisortaq, Henrik Ryberg DR-imut oqarpoq.

Mariane Paviasenilu maanna naammatsippoq. Taassuma Naalagaaffeqatigiit killeqarfiini nammineq nakkutilliisoqarsinnaanani Danmarkip nunarsuarmi sorsunnermut tapiissuteqarnissani salliukkaa paasisinnaanngilaa.

- Ukrainemi sorsunnermut naasanngitsuusamik sorsunnermut atortussianik pilersuinerisa nalaanni, uagut sumiginnarneqarluta misigisimavugut, taanna oqarpoq.

- Piaartumik oqartussaasut akisussaasut nunatta nakkutigineqarneranut illersornissamullu atortorissaarutaasut ullutsinnut naleqquttunik atortoqalersinnaanerput isumagigasuarlissuk, naammanngilaq nunarsuarmioqatigiinnut tulluusimaarlutik sorsunnermut atortussianik aningaasaliisaqattaarnermik nalunaaruteqartarneq, akisussaaffiit naammattumik matussusersinnaanngikkaani.

Mariane Paviasenip ullumikkut oqaaseqartinniarnera periarfissaanngilaq.

Illersornissaqarfiup umiarsui nungullarsimasut ilisimaneqarluarpoq. DR-ip umiarsuit ajorseqataaginnavittut arlaleriarluni allaaserinikuuai.