Issittumi Sakkutooqarfiup umiarsui – kiisami – angalaqqilersut

Illersornissaqarfiup umiarsui alapernaarsuutit marluk februaarip aallaaqqaataanili Nuup umiarsualivianiilerput. Taakkumi motoriinut ikiuutaat ajoquteqangaatsiarmata angalasinnaasimanngillat.

Umiarsuilli Lauge Koch aamma Ejnar Mikkelsen umiarsuarnut allanut ajornartoortunut ikiuinermi naalagaaffeqatigiillu oqartussaanerannik illersuinermut suliassanik suliaqaqqissinnaalerput.

Issittumi Sakkutooqarfik Facebookimi quppernermini allappoq.

- Issittumi Sakkutooqarfik suleqatigisartakkallu umiarsuit alapernaarsuutit ajornartorsiutaannik aaqqiiniarlutik piffissaq sivisooq ulapissimapput maannalu imaani angalallutik suliassanik ingerlatitseqqilersinnaanerat nuannaarutigaarput, kommandørkaptajni Brian Jensen oqarpoq.

- Iluarsaassinerup nalaani sivisuumik Nuummiissimaneq inuttat eqqugaasunut annertuumik piumasaqaateqarsimavoq. Allanngorartumi sulisinnaanermik qujamasuutigisatsinnik inuttat takutitsisimapput, Issittumi Sakkutooqarfik oqarpoq.

Umiarsuit Thetisitut ittut pisoqqat

Umiarsuaq alapernaarsuut Hvidbjørnen umiarsuit teknikkikkut ajornartorsiuteqarneranni Savalimmiunit nunatsinnukartinneqarpoq. Taanna Royal Greenlandip kilisaataata Lomurip Sisimiut eqqaani arfininngormat kivinerani ilaatigut ikiuuppoq.

Umiarsuillu marluk Thetisitut ittut pisoqqat aamma nunatsinnukartinneqarsimapput. Tassanili aamma ajornartorsiuteqartoqarpoq, umiarsuarmi Thetisitoq ittoq Tritonimik ateqartoq Nuummut tikeqqammitsiarluni teknikkikkut aamma ajornartorsiuteqalerpoq iluarsaanneqartariaqarlunilu.

Illersornissamut ministereqarfimmit nalunaajaammi DR-ip allagaatinik takunniffigisinnaasaani umiarsuit ajoquteqangaatsiarnerat Issittumi Sakkutooqarfiup suliaqarniarnerannut ajornakusoortitsisoq allassimavoq.

Illersornissamut ministereqarfik umiarsuarnut nutaanut aningaasassaqarnissamik neriorsuisoq

Sakkutuut umiarsuaat marluk angalasinnaanngitsut pillugit suliaq nunatsinni politikkikkut aamma kamaatigineqarpoq.

Inatsisartunimi nunanut allanut sillimaniarnermullu ataatsimiititaliap siulittaasuata IA-meersup Mariane Paviasenip umiarsuarnut nutaanut nunatsinni isorartuumik nakkutiginnissinnaasunut pisariaqarpallu – sakkunik qamutilinnik atuisinnaasunut piffissamut malinnaasunut aningaasaliisoqarnissaa piumasaraa. Tamannalu nunanut allanut tunngasunut naalakkersuisup, Vivian Motzfeldtip (Siumut) taperserpaa.

- Umiarsuit suliassaminnik naammassinnissinnaasut soorunami pingaaruteqartupilussuupput. Taamaammat isumaqatiginninniarnissani tullinnguuttuni umiarsuit ilaapput, oqaloqatiginninnerillu tullinnguuttuni aamma oqaloqatigiissutigineqartussallutik, taanna KNR-imut marsip arfernani oqarpoq.

Danskit illersornissamut ministeriat, Troels Lund Poulsen Nuummut piffissami tassani tikeraarpoq. Taassumalu umiarsuit nutaat qaqugu piareernissaat ullulernianngilaa. Peqalissaarlu, taakkulu Kalaallit Nunaanni suliaqarnissamut tulluarsagaassasut, taanna KNR-imut oqarpoq:

- Umiarsuit Thetisitut ittut ukiorpassuit atugaareerput. Umiarsuit taakku sisamat qaqugu taarsissanerigut misissussavarput. Tamanna illersornissaqarfimmut upernaamut nutaanik aningaasaliisussanngorutta oqaluuserissavarput, Troels Lund Poulsen KNR-imut oqarpoq.