Danmarkip angalasut takornariallu amerlanerusut ammaassiffigissagai

Danskinut angalajumatuunut aasaaneranilu sulilerinissamut immaqa nalornisunut nutaarsiassatsialaqarpoq.

Angalanissamummi ilitsersuutit killeqarfiillu killilersuiffiginerat qasukkarneqarneratigut nunanut EU-miittunut nunanut Schengemiittunut kiisalu Tuluit Nunaannut juunip ulluisa 27-annit angalasoqarsinnaalissaaq.

Nunanut allanut tunngasunut ministereqarfik tusagassiuutinut taama nalunaaruteqarpoq.

- Nalinginnaasumut ikaarsaariarnissatsinnut alloriaqqissinnaalernerput danskillu nunanut allanut Europamiittunut angalasinnaaleqqinnissaat nuannaarutigaara, Jeppe Kofod (S) oqarpoq.

- Danmarkimi ungasinngitsukkut neriuutigisinnaavallaanngisatsinnit pitsaanerusumik inissisimavugut.

AAMMA ATUARUK Tyskit, islandimiut norskillu Danmarkiliarsinnaanngortut

- Taamaammat angalanissamut ilitsersuutit taama maanna qasukkarsinnaavagut, taamaalilluta Europami nunanut amerlanerpaanut ammarsinnaallutalu angalanissamut ilitsersuutini sungaartumik aappaluartumik qalipaatilimmit sungaartunngortitsisinnaavugut, Jeppe Kofod oqarpoq.

Ilusilersukkami isornannginnerusunut aalajangersaasoqassaaq. Ilaatigut tunillatsittukinnerusut. Taakku nunanut sorlernut ammaassinissamut pingaaruteqassapput.

Nunanut allanut tunngasunut ministereqarfik marsip 13-ianili nunanut allanut tamanut pisariaqanngitsumik tunngaviusumik angalaqqusiunnaarpoq. Tysklandimut, Norgemut, Islandimullu sapaatip-akunnerani matumani ammaassisoqarpoq.

Angalanissamut ilitsersuutit innersuussutaannaapput. Taamaammat malinngikkaanni unioqqutitsinerunngilaq.

Ilusilersukkap annikitsualuttai suli ilisimaneqanngillat, kisianni inatsiseqarnermut ministerip, Nick Hækkerupip (S) oqarnera naapertorlugu aallaqqaasiutigalugu Sverige Portugalilu suli nunani matoqqasutut aalajangersimasumik allassimavoq.

AAMMA ATUARUK Inuit nunarsuaq tamakkerlugu coronavirusimik tunillatsissimasut 7 millionit sinneraat

Sverigemulli tunngatillugu immikkut ittunik malittarisassaqarsinnaavoq, taamaalilluni Sverigep ilaanut ammaassisoqarluni. Assersuutigalugu Øresundip immikkoortuanut.

Nunanut ammasunut mattussaaqqasunullu allattorsimaffik juunip 25-ianni saqqummiussaaq. Aalajangiinermilu tunngavissatut toqqakkat naapertorlugit nunanut allanut tunngasunut ministereqarfiup EU-mi nunat amerlanerpaartaat nunallu Schengemiittut kiisalu Tuluit Nunaat nunani ammasunngortissinnaavai.

- Nunap ”ammasuunissaanut” innuttaasoqassuseq aallaavigalugu innuttaasut 100.000-iugaata 20-t ataallugit kisimik sapaatip-akunneranut tunillatsissimassapput, Nunanut allanut tunngasunut ministereqarfik tusagassiuutinut nalunaarummi allappoq.

- Nunamut ammaassisoqareeraangat nunap ”mattussaaqqasunut” ilaalerluni allanngornissaanut innuttaasut 100.000-iugaangat 30-t sapaatip akunneranut tunillatsissimasassapput, ministereqarfik allappoq.

Nunanut Europap avataaniittunut ilusilersukkamik allattorsimaffimmik suli peqanngitsoq Kofodip oqaatigaa.