Sakkutuut imarsiortut naalagaanertaata tulliusimasumit tusagassiutinut: Danmarkimi sorsuutinik umiarsualiornissaq taamaatittoq
Illersornissaqarfiup nutaanik umiarsuartaarnissaanut, Danmarkip umiarsuaateqarfii namminneerlutik sanaartornissaannut naatsorsuutigissallugit isumatusaarnerunngilaq.
Umiarsuimmi Kalaallit Nunaata aamma Savalimmiut imartaani imarsiorsinnaallutillu nakkutilliisuusinnaasussaassapput.
Sakkutuut imarsiortuni sakkutuut imarsiortut naalagaanertaata tulliusimasoq Torben Ørting Jørgensen DR-imut taama oqarpoq.
Danmarkimimi umiarsuaateqarfinni sorsuutinik umiarsualiortoqassagaluarpat taama ittunik sanaartornermut misilittagaqannginneri pissutigalugit upperiatsajanerusoq, Kattuffimmi Folk og Sikkerhedimi maanna siulittaasuusoq Torben Ørting Jørgensen oqarpoq.
- Taamaattoqanngilluinnarpoq. Pitsaanerit akikinnerillu ujartoriarlutigit pisiariumaarpavut, DR-imut oqarpoq nangillunilu, umiarsuit sorsuutit nunani allaniunngitsoq Danmarkimili sanaartorneqassappata Illersornissaqarfik kissaatimisulli taama sukkatigisumik sakkussiulersinnaanavianngilaq.
Qallunaat sanaartorneri suliffissaqartitsinermik qulakkeerisuussapput
Danmarkimi sorsuutinik umiarsualiortoqarnissaa pillugu kissaateqartoqarnera, illersornissamut ministeriusimasup Morten Bødskovip (S) aggusti 2022-mi saqqummiuppaa.
Illersornissamut sorsuutinik umiarsuarnik nutaanik sanaartortoqarnissaa pillugu, Folketingimi amerlanerussuteqartut qallunaat naalakkersuisui taamanili tapersersulerpaat.
Umiarsuit qassit qanorlu ittut sanaartorneqassanersut, sorsuutit pillugit pilersaarummik aasaanerani sulinngiffiup nallinnginnerani piareersimasoqassasoq pilersaarutaavoq. Naalakkersuisut Savalimmiunilu naalakkersuisut isumaqatiginninniutinittaaq taakkunani ilaapput.
Danmarkimiittumi Esbjergimi umiarsuarnik sorsuutinik ikioqatigiillutik sanaartulertussanik, suliffeqarfinnik arlalinnik ingerlatseqatigiilertussanik pilersitsisoqareerpoq.
Tassanilu umiarsuaateqarfiit misilittagaqanngikkaluartulluunniit qallunaat nunaanni sanaartornissaq isumassarsiatsialaasoq, siulittaasup Hans Schneiderip qularutiginngilaa.
Taamaalilluni Danmark nammineerluni umiarsuarnik sorsuutinik tunisassiulissagaluarpoq, innuttaasuniillu akileraarutit suliffissaqartitsilissagaluartut, taanna DR-imut oqarpoq.
