Danmarkimi Socialdemokratit ikinnerussuteqarlutik naalakkersuisunngussapput
Socialdemokratit taamaasillutik ukiuni tulliuttuni sisamani naalakkersuisuutitaqalissapput.
Ikinnerussuteqarluni naalakkersuisuutitaqarnissamut isumaqatigiissut 18-inik quppernilik, Socialdemokratit, SF-ip, Radikale Venstrep Enhedslistenillu ippassaq isumaqatigiissutigaat.
Naallu Mette Frederiksen, Kalaallit Nunaata Folketingimut ilaasortaatitaanik marlunnik arlaleriarluni ataatsimeeqateqareeraluartoq, Kalaallit Nunaat isumaqatigiissummi titarnerni marlunni taamaallaat taaneqarpoq.
Inuit Ataqatigiilli sinnerlugit Folketingimut ilaasortap Aaja Chemnitz Larsenip isumaqatigiissut isumalluarfigaa:
- Naalagaaffeqatigiinnerup nukittorsarneqarnissaa, Naalagaaffeqatigiinnermilu naligiissumik suleqatigiittoqarnissaa naalakkersuisuutitaqarnissamut isumaqatigiissummi ilaatinneqarmat nuannaarutigaara, politikkikkummi sulinermi tamakku pingaaruteqarput, Aaja Chemnitz Larsen oqarpoq.
Socialdemokratit naalakkersuisunngortitsinissaannut isumaqatigiissummi ima ilaatigut allassimavoq:
- Danmark Naalagaaffeqatigiinnut aamma ilaavoq. Naalagaaffeqatigiinnermi naligiimmik, akuersaartumik nukittuumillu suleqatigiittoqarnissaa naalakkersuisut nutaat kissaatigaat, tatigeqatigiinnerlu tunngaviussaaq. Kalaallit Nunaat Savalimmiullu suleqatigalugit Danmarkip akisussaaffii ineriartortinniarpavut, Socialdemokratit siuttoralugit Danmarkimi naalakkersuisunngortussat pillugit isumaqatigiissummi ilaatigut allaasimavoq.
Socialdemokratit siuittaasuata Mette Frederiksenip, Ataqqinartorsuaq Dronning Margrethe ullumi nalunaarfigiartussavaa Socialdemokratit ikinnerussuteqarlutik naalakkersuisunngortitsisinnaanissaannut tapersersorteqarluni, taamalu statsministerinngortussaalluni.
