Nakorsaaneq: Nunatta avammut matunera coronamut taluuvoq
Covid-19-imut misissuineq angalanerullu politikkikkut killilersorneqarnera.
Taakku Statens Serum Institutimi nappaatit tamanut siaruaattunut pinaveersaartitsinermullu immikkoortortaqarfimmi nakorsaanerup, Anders Kochip nunatsinni coronamik tunillatsissimasut maannamut aqqaniliinnaatinnerannut sunniuteqarluartuunerarpai.
Nunatsinni nakorsaanerup inuit tunillatsissimasut tamarmik peqqisseqqissimasut nunatsinnilu piffissami matumani nutaanik tunillatsissimasunik nalunaarsuisoqarsimanngitsoq siusinnerusukkut paasissutissiissutigaa.
- Virus una silaannakkut ungasissumiit takkunneq ajorpoq, taamaammat inunnik tunillatsissimasunik nunamut isertoqanngikkuni tunillatsittoqarnavianngilaq, Anders Koch KNR-imut oqarpoq.
Nunatsinni kisitsisit appasinnerat Danmarkimi nakorsaanerup Ilisimatusarfimmi aamma nappaatit tuniluuttut pillugit professoriusup tupaallaatigivallaanngilaa. Nunatsinni timmisartukkut angalanerup virusimut illersuiniarneq siunertaralugu matujaarneqarnera maluginiarpaa.
AAMMA ATUARUK Coronavirusip ernumassutigineqarnera: Atuarfiit timmisartuussinerillu matulersut
Angalasut aallannginnerminni misissorneqartut
Nunatsinni nunap iluani avataaniillu timmisartuussinerit marsip ulluisa 21-annit matuneqarnissaat Naalakkersuisut siulittaasuata, Kim Kielsenip marsip ulluisa 17-ianni ilisimatitsissutigaa.
Taama matusineq apriili qaammat tamaat atuuttussanngortinneqarluni sivitsorneqarpoq. Anders Kochillu oqarnera naapertorlugu naak angallannermut piffissami tassani killilersuisoqaraluartoq angalasussat angalasinnaalernissaminnut Covid-19-imut misissorneqaqqaartarput.
Timmisartukkut angalanermi Danmarkimi katsorsarneqareerlutik nunatsinnut angerlartussat angalasinnaapput aamma pisariaqarpat assersuutigalugu peqqinnissaqarfimmi sulisut inuiaqatigiinnilu oqartussani pingaaruteqartuni allani sulisut ilaasinnaapput.
Nunarsuarmili tamarmi nappaatip tuniluuttup Kalaallit Nunaanni tuniluutilertunnginneranut suut pingaaruteqarsimappat?
- Siullertut piffisami siusinnerusumi tunillatsittoqarsimannginnera. Qaammallu kingulleq angallannermut politikkikkut killilersuisoqarnera. Allatut nassuiarsinnaanngilara, tamanna taama killiliinermut sunniuteqaqataasimavoq, Anders Koch oqarpoq, itisiliillunilu:
AAMMA ATUARUK Tamaat isigalugu: Nuummi killilersuisoqaannassasoq - sineriammili atuarfeqarfiit annikitsukkuutaartumik ammassasut
- Nunamut angalalluni isertoqaannarsinnaatillugu killilersuisoqannginneranilu Kalaallit Nunaanni sumiiffiit allat assigalugit nappaalasoqassagaluarpoq. Tamanna assersuutigalugu europami nunani nappaalasoqarfiusuni assigiinngitsuni nappaalasoqarfiugallartuni takusinnaavarput. Spaniami Italiamilu nappaalasoqarnera ilungersunartorujussuarmik inissisimavoq, Danmarkimi ilaatigut taamaattoqanngilaq, pisutigalugu Italiami Spaniamilu siusinaartumik iliuuserineqanngitsunik killilersuisoqalermat.
AAMMA ATUARUK Norgemi Rumaniamilu nakorsat peqqissaasullu Italiamukartut
Peqqinnissaqarfimmi atortorissaarutit killeqartut
Taassuma nunatsinni peqqinnissaqarfimmi atortorissaartut killeqarnerat peruluttullu uninngavigisinnaasaat sumiiffimmi ataasiinnarmiinnera unammillernartutut nassuiaatigaa.
- Kalaallit Nunaanni peqqinnissaqarfimmi sulisoqarniarnermut atortorissaarutinullu atatillugu unammillernartorqarpoq, taamaattoqartillugu Danmarkimut sanilliulluta nappaalasoqarnerani inissaqartitsineq annikinnerussaaq, nakorsaaneq oqarpoq, nangillunilu:
- Nappaalanermik Kalaallit Nunaanni siaruaattoqassagaluarpat peqqinnissaqarfik artukkerneqassaaq. Danmarkimi pissutsit assinganik aamma taamaassapput. Sillimannataasunik inissaqartitsinerunngilagut, tamannalu Danmarkimi pingaarnertut iliuuseriniarneqarpoq – tassa peqqinnissaqarfiit artukkersinneqannginnissaat, taamaalilluta COVID-19-iunngitsumik napparsimasut allat katsorsaannarsinnaassallutigit.
