Danmarkimi ilinniartortatta innersuussutaat oqallisigineqarusuttut

Danmarkimi ilinniartutut allartinissarluarnerunissaannik aaqqissuilluarnerunissaq, inissarsinissaannik ikiuunnerunissaq, kalaallit Danmarkimi illuutaasa tapersersuinerunissaat suliffimmillu nunatsinni misiliinissamik periarfissaqarnerunissaq. Tassa Danmarkimi ilinniartortatta atugarissaarnerulernissaminnut innersuussutaat ilaatigut tamakkuupput.

Danmarkimi ilinniartortatsinnit 50-it missaat atukkatigut unamminartunik qanoq nalaataqakkajunnerlutik, taakkua atugaat ukkatarineqarlutik politikerillu Marienborgimi oqallitsitsinermi saqqummiuppaat. Kalaallit Folketingimut qinikkat, IA-meersoq Siumumeersorlu, oqallitsitsisuupput, Danmarkillu ministeriunera Mette Frederiksen (S) oqalliffissaqartitsisuusoq aamma peqataavoq. Kalaallillu Danmarkimi ilinniartut saqqummiussaat isumassarsiatsialarpassuartallit oqallisigiumaaritik, politikerit pingasut taakkua oqallitsitsereernermi oqarput.

- Inissarsinissamik ikiuunnerunissaq pisariaqartoq oqaatigineqarpoq. Danmarkimut ilinniariartinnan, ingammillu Danmarkimi ilinniareernermi Nuummut angerlaqqinnermi.

- Kalaallit Danmarkimi ilinniartut Århusimi kollegiassarsissunneqariaannaarpasittarput, illoqarfinnilu allani aamma taamaalioriaannaasoqarsinnaanersoq misissuleruttorparput. Taamaammat saqqummiussaat isumassarsiatsialarpassuartaqarput, taakkualu oqallisigiumaarpagut, ministeriuneq Mette Frederiksen oqarpoq.

Pigiliutiinnakkanik isumaqarfigineqartarnerat oqallisaanerulertoq

Danmarkimilu ilinniartortatta isumaat tusaaneqartariaqarluinnartut, Folketingimi ilaasortaq IA-meersoq Aaja Chemnitz isumaqarpoq.

Kalaallit Danmarkimi ilinniartut pingasuugaangata marluk ilinniarnerminni pigiliutiinnakkanik isumaqarfigineqarnermik tallimaagaangatalu ataaseq assigiinngisitsiffigineqarnermik nalaataqartartut, Danmarkimi inuttut pisinnaatitaaffinnik ilisimatusarfiup nalunaarusiaani siorna saqqummersumi allaqqavoq.

Danmarkimi ilinniartortavut atukkatigut oqitsorsiorneruleqqullugit taakkua Danmarkimi peqatigiiffiat Avalak nukittunerusariaqartoq, Aaja Chemnitz isumaqarpoq. Avalammi ukiuni kingullerni sulisinnaassuseqarpianngilaq.

- Avalaap Danmarkimi ilinniartortatsinnit kateriffiunissaata qularnaaqqaarnissaa pingaarpoq. Danmarkimimi kateriffigisinnaasaasa ilaminiinnaraat tarnikkut atugarissaarnissaannut pingaarluinnartoq, taanna oqarpoq.

Danmarkimili ilinniartortavut pillugit kisitsisit saqqummiussat nikallujallannaraluartut pigiliutiinnakkanik isumaqarfigineqartarnerat ukiuni kingullerni oqallisaanerulerneratigut allanngortoqartoq, Folketingimi ilaasortaq Siumumeersoq Aki-Matilda Høegh-Dam isumaqarpoq.

- Ammip qalipaataa tunngavigalugu assigiinngisitsisoqartarnerata, pigiliutiinnakkanik isumaqartoqartarnerata nunasiaasimanerullu sunniutaasa pitsaanerusumillu qanoq iliortoqarsinnaanerata oqallisiginerulernerisigut alloriarnikuuvugut, Aki-Matilda Høegh-Dam oqarpoq.

Angalanermut bilitsit ilinniartortatsinnut akikillineqarlik

Danmarkip ministeriunerata Mette Frederiksenip ilinniartitaanermullu ministeriata Christina Egelundip (M) Danmarkimi ilinniartortatta atugaat pillugit oqallitsitsinermi peqataallutillu tusarnaarnerat aamma alloriangaatsiarnerusoq, Aki-Matilda Høegh-Dam aamma isumaqarpoq.

- Pissutsit tamakkua atuukkunnaaqqullugit iliuuseqarnissaq kissaatigigitsik ministerit taakkua peqataanerminni oqaatigivaat. Folketingimilu ilaasortaqartitta qanoq iliuuseqarnissamik tinnersarnissaat Aajalu suliassaraarput, taanna oqarpoq.

Danmarkimili ilinniartortatta pitsaanerusumik atugaqalernissaannik politikerit qularnaarinissaat Marienborgimi oqallisigisatuarinngilaat. Danmarkimimi ilinniareernerminni nunatsinnut angerlaqqittartut amerlinissaat qularnaarumallugu politikkikkut sunik suliniuteqartoqartariaqarnersoq aamma oqallisigaat.

Danmarkimimi ilinniartortatta affangajaat ukiuni pingasuni ilinniartooreernerminni nunatsinnut angerlaqqissimanngillat. Tamannalu allanngortariaqartoq, Aaja Chemnitz isumaqarpoq.

Taamaammat angerlanermut bilitsit Danmarkimi ilinniartortatsinnut akikillineqartariaqartut, taanna isumaqarpoq.

- Danmarkimi ilinniartuunerminni nunatsinnut attaveqarnerunissaat qularnaarniaraanni ukiumut ataasiaannarlutik nunatsinnukarsinnaasarnerat naammanngilaq. Taamaammat Danmarkimi ilinniareernerminni nunatsinnut angerlaqqinnissamik kajumittut amerlinissaat anguniarlugu nunatta inui, suliffeqarfiit Danmarkimilu politikerit iliuuseqarnerunissaat pisariaqarpoq, Aaja Chemnitz oqarpoq.