Danmark saassunneqarniarsimagaluarpoq
Peqqarniisaarniatut pasineqarlutik unnuaq tigusarineqartut, Danmarkimik saassussinissamik pilersaaruteqarsimagunartut Danmarkimi inatsisinik atortitsinermut ministeri Lene Espersen oqarpoq.
- Danmarkip oqaluttuarisaanerani pisoq ilungersunarnerpaatut isigineqarsinnaavoq. Taamaattumik Danmarkimi isertortumik paasiniaasartoqatigiit peqqarniiserniarlutik pilersaarusiortartunik akiuiniartarnerat toqqissisimanarpoq, Lene Espersen oqarpoq.
Vollmosemi peqqarniiserniarlutik pilersaarutillit tigusarineqartut danskisut innuttaassuseqarput.
Inatsisinik atortitsinermut ministerip aamma ilisimatitsissutigaa tigusarineqartut ilaat ataaseq danskiusoq sinnerilu nunani allani inunngortuusimanngikkunik taakkunannga kingoqqisuusut.
Peqqarniiserfiginiagaat suunersut tamanut saqqummiunneqanngillat, Lene Espersenili naapertorlugu Danmarkip ilaani peqqarniisertoqartussaasimagaluarpoq.
- Sumerpiaq peqqarniiserniarlutik pilersaarutigisimasai itinerusumik oqaaseqarfigerusunngilakka. Paasitinneqarnerali naapertorlugu Danmarkip ilaani peqqarniiserniarsimagaluarput, inatsisinik atortitsinermut ministeri naggasiivoq.
