Danmark: Killeqarfimmik nakkutilliineq sivitsoqqikkaat

Danmarkip Tysklandillu killeqarfiata nakkutigineqarnera danskit naalakkersuisuisa ippassaq marlunngornermi sivitsorpaat. Tamatumuuna ullunik qulinik, marsip sisamaata tungaanut.

Danskit nunanit allamiunut, akuulersitsiniarnermut inissianullu ministereqarfiat tusagassiorfinnut nalunaaruteqarluni taama ilisimatitsivoq.

Killeqarfimmik nakkutilliineq januaarip sisamaani eqqunneqarmalli pingajussaanik sivitsuiffigineqarpoq. Aallaqqaammut ulluni qulini atuuttussanngortinneqarpoq kingornalu marloriarlugu ullunik 20-nik sivitsorneqarluni. Maannalu ullunik qulinik sivitsoqqinneqarpoq.

Ministereqarfik naapertorlugu, nunanit allamiut unioqqutitsillutik Danmarkimiittut amerlivallaalernissaat pinngitsoortissagaanni nakkutiilliisoqaannarnissaa danskit naalakkersuisuisa suli pisariaqarsoraat.

- Naalakkersuisut isumaqarput Danmarkimi eqqissisimasoqarnissaa pillugu, sillimaniarnermullu tunngatillugu, killeqarfik nakkutigiinnarneqartariaqartoq, danskit nunanit allamiunut akuulersitsiniarnermullu ministeriat Inger Støjberg (V) tusagassiorfinnut nalunaaruteqarluni taama allappoq.

- Kikkut nunatsinnut tikinnersut nakkutigisariaqarparput, aamma qimaasut nunasiniartullu Danmarkimi amerlasoorujussuanngornissaat kissaatiginngilarput.

- Naalakkersuisut naliliinerat naapertorlugu, killeqarfimmik nakkutilliineq maannakkorpiaq atorunnaarsissagutsigu nunanit allamiut inatsitsinik unioqqutitsisut Danmarkimit nikeriaqqissinnaajunnaarartarsinnaapput. Taamaammat nakkutilliineq ullunik qulinik sivitsoqqipparput, ministeri taama oqarpoq.

/ritzau/