Covid-19 suli navianartorsiortitsisoq
Nappaat covid-19 siornaakkutut oqaallisaatiginngikkaluarluni virusi taanna suli navianartorsiortitsisoq qularutissaanngivippoq.
Naalagaaffiit Peqatigiit peqqissuunissaq pillugu suliniaqatigiiffiat WHO taama nalunaartoq, nutaarsiassaqartitsivik AFP allappoq.
Ullumi sisamanngornermi ulloq tassaavoq, Kinami oqartussat ukiut sisamat matuma siornagut Wuhanimi napparsimmavimmi uninngasut ilaat immikkuullarissumik puammigut aseruuttoorluni toqquteqarsimasumik nalunaaruteqarfiat.
Taanna pisimasoq, covid-19-ip tunillaassuunnerani toqusut siullersaraat.
Kingorna nunarsuarmi sorpassuit matoorarput, nappaalasullu akuttormata suut tamarmik ilorraap tungaanukaqqileraluartut nappaat taanna suli maannamut tunillaassuuttuarsinnarpoq.
WHO-mut nalunaarutigineqarsimasut naapertorlugit nunarsuarmi decembarimiinnaq inuit 10.000-t covid-19-imik toqquteqarput.
Misissuinerimmi takutippaat, covid-19-imik tunillanneqarsimasut qaammat kingulleq amerleriangaatsiarsimasut.
Napparsimmavinnut unittariaqarsimasut novembarimut naleqqiullugit 42 procentimik amerleriarsimapput, peruluttunullu uninngavinniittut 62 procentimik amerleriarsimallutik.
Taamaammat WHO-p peqqinnissaqarfiit covid-19-ip qanoq tunillaassortigineranik nakkutiginnittuarsinnarnissaannik, tunillanneqarsimanermik misissuuteqartuarsinnarnissaannik, tunillanneqarsimasunik nakorsaajuarsinnarnissaannik akiuussusersuiuarsinnarnissaannillu kaammattorpai.
