Coronavirusimik Europami toqquteqartut 250.000-nngortut

Europami coronamik tunillatsissimallutik toqusut sapaammi 250.000-nngorput, nunat ataasiakkat kisitsinerannit tamanna takuneqarsinnaavoq.

Aatsaat taama amerlatigisut paasineqarpoq, nunallu arlaqartut nalunaarutigaat, coronamik tunillatsissimasut amerligaluttuinnnartut.

Europami tamarmi sapaatit akunneranni ataatsimi toqusut aatsaat taama amerlatigipput, maajip qaammataata qiteqqunnerani kingullermik taama amerlatigalutik.

Europami nunani assigiinngitsuni killilersuinerit assigiinngitsut ilaat naalakkersuisunit atuutilersinneqarput, ukioq manna tuniluunnerup siaruatsaalineqarneranut atuutilersinneqartut assingi.

AAMMA ATUARUK WHO: Coronamik toqquteqartut 2 millioninngoreerpata akiuussutissaqalissaaq

Italiami coronamik tunillatsissimasutut arfininngornermiit sapaammut nalunaarsorneqartut 11.705-iusut, Italiami peqqissutsimut ministereqarfiup nalunaarutigaa. Tunillatsissimasut aatsaat taama amerlatigipput.

Europamili nunat ilaanni, tassa Tuluit Nunaanni, coronavirusimik toqquteqartut Italiami toqquteqartunit amerlanerupput. 

Tuluit Nunaanni coronavirusimik tunillatsissimasut 722.000-it nalunaarsorneqarsimapput, taakkunanngalu 43.646-it toqusimallutik.

Nunarsuarmi tamarmi coronamik tunillatsissimallutik toqusut 1 millionit angugaat, ullut 20-it matuma siorna nalunaarutigineqarpoq.