Coronamut tunillatsissimasumik toqusoqaqqittoq
Coronamik tunillatsissimasumik marlunngornermit toqusoqaqqippoq.
Toqusoq utoqqaavoq tunillatsinnginninnermini napparsimareersoq. Covid-19-imilli tunillatsissimanera toquneranut pissutaaqataasinnaavoq, Nakorsaaneqarfik paasissutissiivoq.
Nunatsinni coronamik tunillatsissimasunik tallimanik taamaalilluni toqusoqareerpoq.
Nunatsinni killilersuinerit - naatsumik
Nunatsinni tamarmi tamanit iserfigineqarsinnaasuni coronapas atuutissaaq.
Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit:
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
Imigassamik nioqquteqarneq nunatsinni kommuninit tallimanit sisamani februaarip aallaqqaataanut imaluunniit ulluisa qulingiluaannut inerteqqutaagallarpoq.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit.
Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
Napparsimmavimmi uninngasut ippassaq nalunaaqutaq ualikkut sisamanut 14-ipput. Sisimiuni covid-19-imik tunillatsissimasut nutaat marluk unitsinneqarput, Nuummi arfineq-marluk, Aasianni marluk Qaqortumi marluk Uummannamilu ataaseq uninngapput.
Meeqqat marluk suli peruluttut uninngavianniittut
Napparsimmavimmi uninngasunit tallimat corona kisiat pissutigalugu uninngapput. Taakkunannga marluk peruluttut uninngavianniipput.
Uninngasunit 14-init qulingiluat tunillatsissimasuupput – coronali unitsinneqarnerannut pissutaanerpaanngilaq, Nakorsaaneqarfik nalunaaruteqarpoq.
Meeqqanillu marlunnik peruluttut uninngavianni suli uninngasoqarpoq. Taakku coronamik tunillatsisisimanerminnik kingunerluuteqarput.
AAMMA ATUARUK Tunillatsissimasut nutaat 214-it – meeqqat marluk uninngasut
- Meeqqat marluk covid-imik tunillatsinnermi kingunerisaanik timimi ilaatigut sunniivigineqarlutik kingunerluuteqarnerat qaqutigoortuuvoq. Tamanna qaqutigoorluinnarpoq, nakorsaaneq Henrik L. Hansen marlunngormat oqarpoq.
- Napparsimaruluttut akiuussutissamik kapitinneqanngitsuupput. Meeqqanut tunngatillugu taakku akiuussuserneqarnissaanut aatsaat neqerooruteqartoqaleqqammerpoq, taamaammat tamakkiisumik akiuussuserneqanngillat.
Tunillatsissimasut amerlassusaat ataatsimut ilisimaneqanngitsut
Misissuisarnermut periutsip sapaatit akunnerisa marluk matuma siorna allanngortinnerat pissutigalugu tunillatsissimasut qanorpiaq amerlatiginerat ilisimaneqanngilaq. Naalakkersuisut oqarnerat naapertorlugu tamanna nunatta "immikkoortut pingajuanniilerneranut tassa tuniluunnerup siammasinnerata ataavarneratalu peqqinnissaqarfimmut ilungersortitsineranik pissuteqarpoq."
Tamatuma kingorna napparsimaruluttut kisimik PCR-imik misissortissinnaalerput. Aallat sinneri angerlarsimaannassapput, imminut misissussapput imminnullu peqqissisutut nalunaarutigisassallutik.
AAMMA ATUARUK Borgmesterit imigassaarniaqqusinnginnermut: Fase 3-miippugut fase 4 ajornerpaajusoq
Nakorsaaneqarfik nittartakkamini ullut tamaasa saqqummiuttagai PCR-imik misissortissinnaasunit misissukkanit ikittuinnarneersuupput. Taamaammat tunillatsissimanerminnik ilisimanninngitsut imaluunniit imminnut misissoreersimasut kisitsisitigut ilisimaneqanngitsut amerlangaatsiarsinnaapput.
Nunatsinni tunillatsissimasutut nalunaarsorsimasut januaarip aallartinnerani amerlanerpaagamik 2.718-iupput.
