Borgmesterit imigassaarniaqqusinnginnermut: Fase 3-miippugut fase 4 ajornerpaajusoq
Kommunini tallimaasuni pingasut imigassaarniarnermut maanna inerteqquteqarput.
Kommune Kujalleq, Qeqqata Kommunia Kommuneqarfik Sermersoorlu inerteqquteqartuupput.
Coronavirusip tuniluutipiloornera unikaallatsinniarlugu taamaaliortoqarpoq.
- Massakkut tuniluunnerujussuaq eqqarsaatigalugu fase 3-miippugut fase 4 ajornerpaajusoq.
Charlotte Ludvigsen (IA) oqarpoq. Taanna Kommuneqarfik Sermersuup borgmestereraa.
AAMMA ATUARUK Unnuap qeqqanit atuutilissasoq: Kommunini pingasuni imigassamik inerteqquteqarneq
Kommuneqarfik Sermersuumi Kommune Kujallermilu imigassaarniaqqusinnginneq sapaatit
akunnerini marlunni sivisussuseqarpoq - tassa februaarip qulingiluaata tungaanut.
Nunatsinni killilersuinerit - naatsumik
Nunatsinni tamarmi tamanit iserfigineqarsinnaasuni coronapas atuutissaaq. Tassa neriniartarfinni, imerniartarfinni, filmertarfinni, katersortarfinnilu assigisaanilu.
Ukununnga isissaguit qanermut assiaquteqassaatit
- Tamanit iserfigineqarsinnaasuni (pisiniarfinni, oqaluffinni, atuakkanik atorniartarfinni assigisaanilu).
- Bussinut taxanullu ilaanermi.
Nunatsinni tamarmi neriniartarfiit imerniartarfiillu isersinnaasut, qatserisartut amerlassusaasinnaasutut akuerisaasa affaannaat isertissinnaassavaat.
Sumiiffiit imigassamik sassaallerfiusartut tamarmik februaarip aallaqqaataata tungaanut nalunaaqutaq 22 matusassapput.
15-ileereersimaguit akiuussuserneqarsimanallu taava atuakkanik atorniartarfinnut, filmertarfinnut, imerniartarfinnut, neriniartarfinnut allanullu tamanit iserfigineqarsinnaasunut iseqqusaanngilatit. Tamanna pisiniarfinnut aamma pisortat angallassisutaanut atuutinngilaq. Isernissannut tunillatsinnikuusimanerit uppernarsarsinnaassavat.
Januaarip ulluisa 26-at aallarnerfigalugu Kastrupimi nassatanik tunniussinermi tunillatsissimannginnermut uppernarsaateqarnissaq pisariaqarunnaarpoq. Tassa misissortissimanermut piumasaqaat atuukkunnaarpoq.
- Ernummatigaarput weekendimi, ullut 14-ikkaarlugit akissarsiat, ikiorsiissutit, qaammammusisussat feriepengesisussallu aningaasarsippata ernguttut amerlinerisigut tuniluunneq suli annertuninngorsinnaasoq. Erngunnerullu kingunerisaanik ajoqusertut allallu unioqqutitsinerit annertuseriaannaasut.
Charlotte Ludvigsen pissutsit ilungersunarseqqasut oqarpoq. Peqqinnissaqarfiit, politiit utoqqaallu angerlarsimaffiini sulisut pisariaqartinneqartut naammaqqartut taanna oqarpoq.
Immiaaqqat, viinnit imigassallu kimittuut Qeqqata Kommuniani sapaatit akunnerini marlunni tuniniaqqusaanngereerput.
Artukkiisoqarnissaa ernummatigineqartoq
Immiaaqqat, viinnit imigassallu kimittuut Qeqqata Kommuniani sapaatit akunnerini marlunni tuniniaqqusaanngereerput.
Inerteqquteqarneq ippassaq marlunngornermi unnuaqeqqanut atorunnaartussaagaluartoq februaarip aallaqqaataanut sivitsorneqarpoq.
- Peqqinnissaqarfimmiut namminneq misilittakkatik aallaavigalugit akissarsiffiit peqqinnissaqarfimmut ulapisitsinerulertarput. Ilungersunartorsiorfimmeereernermik saniatigut ulapinnerulernissartik ernumagaat.
Qeqqata Kommuniani borgmesteri Malik Berthelsen (S) oqarpoq. Taanna imigassamik nioqquteqaqqusaannginnerup sivitsorneqarnissaanut Sisimiuni nunap immikkoortuani nakorsaanermit piumaffigineqarsimalluni oqarpoq.
- Taassuma saniatigut kommunit tamatta politimestereqarfimmiit allagarsivugut, imerniartarfiit matoqqanerisa nalaanni akissarsiffinni angerlarsimaffinni eqqissiviilliornerit annertuumik pinissaat politeeqarfinninngaanniit ernumagineqartoq, Malik Berthelsen (S) oqarpoq.
Avannaani inerteqqutinngunngitsoq
Nunatsinni kommunit avannarpasinnersaat, tassaasut Kommune Qeqertalik Avannaata Kommunialu, imigassaarniarnermut inerteqquteqalerusunngillat.
- Massakkut matusissagaluarutta ajornartorsiut kingusinnerusumut illikartiinnartussaavarput, taamaattumik matusinissaq aqqutissaanngitsutut aalajangernikuuarput.
Avannaata Kommuniani borgmesteri Palle Jerimiassen oqarpoq, nangipporlu:
AAMMA ATUARUK Nunatsinnut angalasut misissortittarunnaartut sumiiffinnilu killilersuutit nuna tamakkerlugu atuutilersut
- Maani Ilulissani Upernavimmilu corona annertuumik atoreernikuuarput. Taamanikkullu aamma takuarput innuttaasut namminneq akisussaaffimmik tigusillutik ingerlassinnaasimavaat, taanna oqarpoq.
Tuniluunnerullu nalaani imigassap matunissaanik peqqutissaqannginnamik
Namminersorlutik Oqartussat maleruaqqusaat naammattoq oqarpoq.
Naalakkersuisut nuna tamakkerlugu killilersuutinik ippassaq marlunngornermi atuutsitsilerput. Killilersuutit februaarip 14-iata tungaanut atuutissapput.
Ilaatigut kikkunnilluunniit iserfigineqarsinnaasuni kapitissimanermut uppernarsaammik qanermullu assiaquteqarnissaq sumiiffinni tamani atuutsinneqalerluni.