Siumup Erik Jensen nunatsinni partiit annersaanni siulittaasussatut toqqarmagu Kim Kielsen parteeqatiminit uppisinneqarpoq.Assi: KNR / Malik Brøns

Corona, siulittaasumut qinersineq Pituffillu: Ukioq manna politikkikkut pisut annerit aaku

Corona, Siumumi siulittaasumut qinersineq Pituffimmilu kiffartuussinissamut isumaqatigiissutit. Taakku politiikkikkut ukioq manna pisut annersarigaat, Ilisimatusarfimmi adjunkti naliliivoq.

Nunarput nunarsuaq tamakkerlugu coronamik 2020-mi tuniluuttoqarneranit eqqorneqarujussuanngikkaluartoq, covid-19 nunatsinni inuiaqatigiinnut malunnaatilimmik kinguneqarpoq. Ilisimatusarfimmi inuiaqatigiilerinermi ilisimatooq, Rasmus Leander Nielsen isumaqarpoq.

KNR-ip taanna 2020-mi politikkikkut pisunik pingasunik malunnaateqartunik toqqaasippaa.

Naak nunatsinni coronamik toqquteqartoqanngikkaluartoq napparsimarujussuartoqanngikkaluartorluunniit virusi Rasmus Leanderip politikkikkut ukioq manna pisuni annerpaatut inissisimatippaa.

Ikiorsiissutit karsimilu amigartooruteqarneq

- Aningaasaqarnermummi sunniuteqarpoq, aamma inuussutissarsiuteqartunut unammillernartoqartitsingaatsiarpoq, ilisimatooq oqarpoq.

- Soorunami takornariaqarnermik suliaqartut staycation nassaarsiorfigisariaqarpaat, nunamilu najugallit aningaasarsiorfigisaqarlugit. Aningaasaqarnermilu kisitsisit pingaarutilinnut inuussutissarsiutinullu allanut ajoqutaassaaq, Rasmus Leander Nielsen oqarpoq.

Suliffeqarfiit nunarsuaq tamakkerlugu coronap tunillaassuunneranit aningaasaqarnikkut eqqugaasut aningaasatigut ikiorsiissuteqarfigineqarnissaannik ukiup ingerlanerani qasseeriarluni pilersitsisoqarpoq.

Takornariaqarnermik suliaqartut eqqugaangaatsiartut ilagaat, nunatsinnimi nunanilu allani killilersuisoqarnera nunarsuaq tamakkerlugu angalasoqartarneranut nalinginnaasumut unitsitsivoq.

Siumumi siulittaasumik qinersineq

Siumumi siulittaasumut qinersineq ukioq manna aamma malunniuteqangaatsiarpoq. Tassani Kim Kielsen ukiuni arfinilinni siulittaasooreerluni 45-nik ukiulimmit, Erik Jensenimit ajugaaffigineqarluni taarserneqarpoq.

Siulittaasumut novembarip naanerani qinersisoqarpoq, siulittaasunngortorlu decembarip aallartinnerani juullimut sulinngiffeqalerpoq.

Taamaammat nunatsinni partiit annersaanni susoqassanersoq suli erseqqivinngilaq.

 

Assi: Erik Jensen aamma Kim Kielsen Siumumi siulittaasussamik qinersinermi. Assi: KNR / Malik Brøns. 

Kim Kielsenili suli naalakkersuisunut siulittaasuuvoq - siulittaasuuginnarnavianngitsorlu Rasmus Leanderip nalilerpaa.

Siumumi siusinnerusukkut Siumut naalakkersuisuniinnerani partiimi siulittaasoq aamma naalakkersuisuni siulittaasuunnginnikuuvoq. Lars-Emil Johansen 1988-imit 1991-imut Siumumi siulittaasuuvoq Jonathan Motzfeldtilu Namminersornerullutik Oqartussani taamani siulittaasuulluni.

Ramus Leander Nielsenip pingasunik pisoqarsinnaasoq nalilerpaa: Kim Kielsen Naalakkersuisut siulittaasuatut tunuarsinnaavoq atuuffillu Erik Jensenimullu tunniullugu.

Aamma Naalakkersuisut siulittaasuatut atuutiinnarsinnaavoq. Aammalu qinersinissamik suaaruteqarsinnaalluni.

- Siumut avammut saqqummeraangat kina akisussaasuunersoq pillugu qularutiginnittoqalissappat nunatta avataanit suleqatigisaanut Inatsisartunilu isumaqatigiissutinut atatillugu kingunerlussinnaavoq. Kina siuttuunersoq ersernerlutsillugu ukiukkut ataatsimiinneq aallartippat nalorninartoqartupilussuussaaq. Ukiumili kingusissukkut aalajangertoqarmat, sulilu iluamik inerneqanngimmat, susoqassanersoq 2021-mi ukiup affaani siullermi malinnaaffigissavarput, Rasmus Leander Nielsen oqarpoq.

Pituffik

Pituffik pillugu kiffartuussinissamik isumaqatigiissutit politikkikkut ukioq manna pisut annerit pingajoraat.

Kiffartuussinissamik isumaqatigiissutit maanna amerikamiut ingerlatseqatigiiffianut isumaqatigiissutaasut 2024-mi qaangiuttussaapput. Tamatumalu kingorna ingerlatseqatigiiffik kiffartuussinissamik isumaqatigiissuteqarfiusoq nunatsinni allaffeqarfeqartuussaaq.

Ingerlatseqatigiiffik nunatsinni najugaqartunik siulersuisoqassaaq.

Naak isumaqatigiissutit sunniutaat ukiani arlalinni malugineqarnavianngikkaluartut suut tamarmik iluatsissappata isumaqatigiissuteqarneq nunatsinnut pingaaruteqangaatsiarpoq.

Rasmus Leanderip isumaqatigiissut nutaaq isumaqatigiissutip siulianut sanilliullugu nunatta karsianut pingasunik kisitsisitalinnik millioninik isertitaqarfiunerusussatut nalilerpaa.

 

Assi: Scanpix. 

- Nunatta USA-mik suleqateqarnerani assigiinngitsunik tapiissuteqarnikkut aaqqissuussisoqassaaq. Tamanna Issittumi nunarsuup ilaani naalakkersuinikkut pissutsinut annertuunut sunniuteqassalluni, ilisimatooq oqarpoq.

Siulittuisoqarsinnaanngilaq, ilisimatoorli nunatsinni politikkikkut pisussat pillugu eqqarsaatersuuteqarpoq.

- Kommunimut qinersisoqartussaavoq. Tamannami ukiut sisamakkaarlugit aalajangersimasumik pisarpoq. Aamma Inatsisartunut qinersissanerpugut? Tamanna ilimagipajaarpara, Rasmus Leander Nielsen oqarpoq.

Rasmus Leander Nielsenip Siumumi nikanarsaalluni tiingaffiginninneq pillugit suliat, Hans Egedep eqqaassutissaata inissisimavia Kim Kielsenillu ikinnerussuteqarlutik naalakkersuisoqatigiivi malunniuteqartutut aamma eqqaavai.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl