Corona pissutaalluni Arctic Sportsimi unammersuarnissat kinguartippaat
Arctic Sports Greenlandimi siulersuisut unammersuarnermullu ataatsimiititaliaq qanittumi ataatsimiinnermi aalajangerput Nunatsinni unammersuarnissaq NU-mut naalisarneqartartoq kinguartinneqassasoq.
- Coronap tuniluunnera annertuvoq uagullu akisussaaqataanerput takutikkusullugu pissartanngorniunnissanik kinguartitsivugut, Arctic Sports Greenlandimi siulersuisuni ilaasortaq Claus Nielsen KNR-mut oqarpoq.
AAMMA ATUARUK Video: Arctic Sportsimi rekordit nutaat pingasut
Pilersaarutit malillugit unammersuarnerit martsip arfineq aappaanni Ilulissani aallartittussaagaluarput sineriammilu sumiiffinnit arlalinniit peqataaffigineqartumik sapaatip akunnera missaliorlugu unammersuartoqartussaagaluarluni.
- Ilulissani aaqqissuisuusussat aamma oqaloqatigivagut. Maanna Ilulissani coronap tuniluutingaatsiarnera aaqqissuisut ernumanartoqartippaat. Taamaattumik kinguartitsinissamik aalajangerneq aaqqissuisut qanimut attavigereerlugit aalajangiunneqarpoq, Claus Nielsen oqarpoq.
Arctic Sportsimi siorna pissartanngorniunnerit pisarnermit annikinnerusunngorlugit ingerlanneqarput timikkut attuuttarluni unammeriaatsit peerallarneqarlutik.
Unammeriaatsit tamakkerlugit unammissutiginissaat ukiormanna pilersaarutaavoq eqqarsaatigisassat allanik ilaqalermata.
- Arctic Winter Games 2023-p aallartilaarnerani pisussaavoq. Taamaattumik Nunarput sinnerlugu unammiartortussat toqqarneqrtussaapput. Pingaaruteqartorujussuuvoq toqqarneqarsinnaasut unammersuarnerni takoreersimanissaat, Claus Nielsen oqarpoq.
Iluliarmiut unammersuarnernik suli aaqqissuisuussapput ilimagineqarluni oktoberimi unammersuartoqarsinnaajumaartoq.
