Video: Arctic Sportsimi rekordit nutaat pingasut

Arctic Sports Greenland Nunatsinni KNR suleqatigalugu unammersuartitsivoq illoqarfiit pingasut assigiinngitsut ataatsikkut unammiffigalugit
Allattoq Noah Mølgaard
apriilip 26-at 2021 14:11

Steffen Knulst Arctic Sportsimi unammersuarnerrmi sapaammi unnukkut naammassisumi nutaanik marlunnik rekordiliivoq.

Bent Jakobsen Nuummeersoq aamma unammissummi kakkalluinnarfigisamini Alaskan high kickimi rekordiliivoq.

Unammersuarnerit Uummannami, Ilulissani, Nuummilu ataatsikkut ingerlanneqarneranni sumiiffinnit tamanit KNR toqqaannartumik aallakaatitsivoq.

Peqataasut 50-it sinnilaaqqavaat.

Taama pisoqarpoq corona pissutigalugu killilersuisoqarmat. Unammersuarnermi kinguartinneqarsinnaavoq illoqarfimmi unammiffiusussami tunillatsittoqassagaluarpat – tamannalu Arctic Sports Greenlandip ernummatigerusunnginnamiuk illoqarfimmi ataatsimi pinnani illoqarfinni pingasuni unammersuartitsivoq.

Rekordit nutaat pingasut

Taamaattoq unammisartut tamaviaarsinnaanertik tamaat sukataarluarmata unammersuartarnermi pingasoriarluni rekordiliisoqarpoq.

Siulleq sisamanngornermi unnukkut pivoq unammeriaatsimi two foot high kickimi tassanilu unammeqataasut isikkat illuttut qummoortillugit isimmissisarput nikorfarillutillu tukkunik aatsaat periarnerat akuerineqarsinnaalluni.

Steffen Knulstip rekorderilerpaa 2 meter aamma 42 centimeter Uummannap timersortarfiani portussutsimut tassunga misiliinermi siullermi iluatsikkamiuk.

Bent Jakobsen Nuummeersoq aamma unammersuarnermi rekordiliivoq unammisaatsimi Alaskan high kickimi. Tassani unammeqataasut timi tallimik ataatsimik kivissinnarlugu isikkap illuanik arsaaraq isimmittarpat. Rekordilu nutaaq tassaalerpoq 2 meter aamma 26 centimeter.

Pikkunarnersaat

Steffen Knulstip unammersuarnerit naggaserluavippai unammissutsit pikkunarnersaanni One foot high kickimi unammersuarnermi nutaamik rekordiliigami.

Tassani peqataasut arsaaraq isikkap illuanik isimmissinnarlugu niu isimmitsissutigisaq tussutigisussaavaat. Rekordi nutaaq tassaalerpoq 2 meter aamma 76 centimeter.

Arctic Sports Greenland ilisimatitsivoq peqataasut ujaminnattaavi peqatigiiffiinut nassiunneqassasut. Tassami pisarnertut ujamminik agguaasoqarsinnaannginnami.

Angusat pointitigullu angusat tamakkiisut takusinnaavatit linki ataaniittoq toorlugu.