Corona pillugu malittarisassat nutaat: Islandimut ammarneq katerinnermullu malittarisassat nutaat
Coronamut tunngatillugu nunatsinnut tikittunut qanorlu katerittoqartarnissaanut nutaanik malittarisassaqalerpoq.
Taakku naalakkersuisut nalunaarutaanni nutaani marlunni atuarneqarsinnaapput.
Savalimmiuni najugaqartut danskisullu innuttaassuseqartut, imaluunniit islandimiutut innuttaassuseqartut taakanilu najugaqartut nunatsinnut isersinnaanermut killilersuinernut assigiinngitsunut ilaatinneqanngillat.
AAMMA ATUARUK Tikittut siulliit nuannaarutigineqarlutillu ernumatigineqartut
Killilersuinerniilli ilaatinneqannginnissamut Islandimit Savalimmiuniilluunniit nunatsinnut toqqaannartumik angalanissaq nunallu taakku arlaat ullut 14-it sioqqullugit najorsimanissaat piumasaqaataavoq.
Nunatsinnulli Savalimmiuniit Island aqqusaarlugu angalasoqarsinnaavoq.
Taakku qulakkeersimagaanni killilersuinerit allat pinngitsoorneqassapput. Siullertut angalasup nunatsinnukartumut timmisartumut ikitinnani coronamik tunillatsissimannginnerminik uppernarsaanissaa piumasaqaataanngilaq.
Savalimmiuni coronamik tunillatsissimasut 187-iusimapput. Kingullermik apriilip ulluisa 24-anni tunillatsissimasumik nalunaarsuisoqarpoq.
Islandimi coronamik tunillatsissimasut 1.815-iusimapput. Kingullermik juunip ulluisa 16-ianni tunillatsissimasunik (pingasut) nalunaarsuisoqarpoq. Coronamik tunillatsissimasut oqartussanit ilisimaneqartut arfineq-pingasuupput.
Kisitsisit juunip ulluisa 17-ianneersuupput.
Tusarfiit: Covid.is aamma Savalimmiuni Nakorsaaneq
Tamatuma saniatigut tikinnerup kingornatigut coronamik tunillatsissimanngitsutut uppernarsaateqartigani katerinnernut aaqqissuussinernulluunniit peqataanissamut inerteqquteqarneq atuutinngilaq.
Savalimmiunit Islandimiilluunniit angalasut tikinniariarlutik sutorniartarfinnukarsinnaatitaallutillu pisiniarfinnukarsinnaatitaapput. Danmarkimeerunilli tikinnermit ullut tallimat qaangiunneranni coronamut misissortissapput – imaluunniit ulluni 14-ini angerlarsimaffimmit aninaveersaassallutik.
Timersornermi killilersuinerit
Katerinnernut atatillugu nutaanik malittarisassaqalerpoq.
Imminnut unammisoqassatillugu illup iluani silamiluunniit inuit 30-nit amerlanerunissaat inerteqqutaavoq. Nunatsinnilu sumiiffinnit assigiinngitsuni peqataaffigineqartussaaguni taamaallaat 30-t katerissinnaapput. Assersuutigalugu nunatsinni isikkammik arsarnermi pissartanngorniuunneq taamatinneqaqqammersoq.
AAMMA ATUARUK Arsaannermi GM taamaatinneqarpoq
Aaqqissuussinerit inuit imminnut unamminngikkunik peqataasullu najukkameersuugunik illup iluani pisumi inuit 100-it katersuussinnaapput.
Pisussaq silami pisussanngortinneqaruni – inuillu aaqqissuussamut peqataajartornissaannut kaammattorneqanngikkunik inuit 250-it katersuutsinneqarsinnaapput, Naalakkersuisut nalunaarutaanni allassimavoq.
