Arsaannermi GM taamaatinneqarpoq
KAK-mi siulersuisut juni aallartilaartoq aasaanerani pissartanngorniunnissanut nalunaartunut kaammattuivoq silami pissartanngorniunnissanut billettisinaversaartoqarallassasoq. Nalornineq pivoq corona pissutigalugu sillimasoqarnerani pissartanngorniuttoqarsinnaanersoq qularnarsimmat.
Aalajangernerlu marlunngornermi unnukkut pivoq KAK nalunaarmat pissartanngorniunnissat taamaatiinnarneqartut – neriuuteqalaartoqaraluartoq.
- Namminersorlutik Oqartussat nalunaarutaat aggustip aallaqqaataata tungaanut atuuttussaq malillugu silami isikkamik-arsaalluni pissartanngorniunnissaraluit pisinnaajunnaartutut isikkoqalermata, KAK Facebookimi quppernermini allappoq.
AAMMA ATUARUK Covid-19: Arsaannermi GM nalorninartumiittoq
- Nalunaarummi ilaatigut allassimavoq inunnit 30-nit amerlanerusunit sumiiffinnillu assigiinngitsuneersunit peqataaffigineqartussanik aaqqissuisoqarsinnaanngitsoq, KAK itisiliivoq.
Neriuuteqalaarput
Silami pissartanngorniunnissanut nalunaarnissaq junip aallaqqaataanut killeqarpoq. Angutit inersimasut kisiisa eqqarsaatigissagaanni iligiit 20-it nalunaarput iligiillu ataatsit 22-it missaliorlugit arsaattoqartarlutik.
KAK-mit neriuutigineqaraluarpoq qanillinaversaarnissamut eqqiluisaarnissamullu inassutit tunngavigalugit arsaaffinni malittarisassiornikkut GM suli pisinnaagaluartoq.
- Peqqussutit allanngorsinnaanerat sivitsorneqarsinnaaneralluunniit ilimasaarutigineqarmat kattuffimmit nalilersuinerit ingerlattuarumaarpagut, massakkulli taama isikkoqartillugu pissartanngorniunnerit ingerlanneqarsinnaanngillat, KAK nalunaarpoq.
AAMMA ATUARUK Ilulissani arsaattarfissami sulineq aserorterisoqarnera pissutigalugu kinguarsarneqarpoq
Arsaattarfimmi nuannattoqarnissaa augustip aallartilaarnerani pisussaagaluarpoq angutit inersimasut Ilulissani pissartanngorniuttussaammata. Ivigaasaaqqanik qallikkamik illoqarfik arsaaffittaangajalerpoq illoqarfiullu arsaattartui Nagdlúnguak siorna pissartanngorlutik.
