Ilulissani arsaattarfissami sulineq aserorterisoqarnera pissutigalugu kinguarsarneqarpoq

Meeqqat, inuusuttut allaallumi inersimasut arsaattarfittaassamiittartut arsaattarfissap maanna manissarneqareerlunilu ivigaasalersorneqartussap inaarsarniarneranut ajornartorsiortitsingaatsialersimasut kommunip oqaatigaa:

- Arsaattarfittaassami atortussanik kingullertigut aserorterisarnerit pissutigalugit arsaattarfissami suliniarneq kinguarsarneqartualerpoq. Taamaammat aamma atortussanik nutaanik Danmarkimiit piniartariaqarsimavugut, qujanartumilli taakku umiarsuartigut juunip tallimaani tikissapput, Mogens Holmegård Mortensen, Teknikkeqarnermut Ingerlatsivimmi sanaartornermut pisortaq oqarpoq.

Puussiarsuit gumminik seqummalasunik imallit sissorneqarsimasut

Assersuutigalugu puussiarsuit gumminik seqummalasunik imallit savimmik kingullertigut sissorneqarsimapput, tamannalu pissutaalluni saliisoqangaatsiartoqartariaqarmat arsaattarfissami sulineq kinguarsarneqarsimavoq.

- Arsaattarfiliassami sulinerup kinguarsarneqartuarnera ajuusaarnarpoq, taamaammallu innuttaasut kajumissaarusuppagut arsaattarfiliassap suliffeqarfiuneranik ataqqinnillutik tamaaniittaqqunagit. Arsaattarfissaq naammassiaarsinnaagutsigu innuttaasunit atorneqarsinnaaliaarnerussaaq, Mogen Holmegård Mogensen, Teknikkeqarnermut Ingerlatsivimmi sanaartornermut pisortaq, oqarpoq.

AAMMA ATUARUK Meeqqat inuusuttullu aputaajaasut: Ivikkani arsarsinnaalingajannissartik neriuutigigaat

Sanaartortitsisartut arsaattarfissap kommunimut tunniunneqarnissaata tungaanut arsaattarfissamik akisussaasuusut aserorterisarnernik politiinut nalunaarutiginnereerput.

Arsaattarfissami sulineq sapaatip akunnerani kingullermi aallarteqqinneqarpoq. Ivigaasanik tunniniaasartuni Nordisk Kunstgræs Importimi atorfilik arsaattarfissami ivigaasalersuinissamut ilitsesuiartorlunilu ivigaasalersueqataajartorluni piaartumik Ilulissiartussanngorpoq.

Arsaattarfissap juunip ulluisa 30-anni atoqqaarfissiortinneqarsinnaanissaa kommunimiit naatsorsuutigineqarpoq.