Tikittut siulliit nuannaarutigineqarlutillu ernumatigineqartut
Nunatsinnut angallanneq ataasinngornermi ammarneqaqqippoq. Nunatsinnullu timmisartoq siulleq nalinginnaasumik ilaasulik marlunngornermi tikippoq.
Tikeraanut angerlartunullu niuffiortut tikittullu ilaat Nuup mittarfiata silataani KNR-imit naapippagut.
Maren Clasen Poulsenip qatanngutini Danmarkimi najugaqartoq niuffiorpaa.
Niuffiortut mittarfiup utaqqisarfianeeqqusaanngimmata qiianaraluaqisoq mittarfiup silataani nalunaaquttap akunnera ataaseq sinnerujussuarlugu utaqqivoq.
Taassuma qatanngutimi takunissaa qilanaaralugulugu annilaangagilaarpaa.
- Qilanaarpunga kisianni aappaatigullu annilaangapajaarlunga ilaa corona aqqutaani qanoq pisoqassanersoq nalunarnermut.
- Nammineq aallarnissani nalaani pingasoriarluni misissortereernermini ajunngittoq paasivarput. Kisianni timmisartorsuarmi ilaasussat nalunaqimmata aamma amerlasimassaqimmata, Maren Clasen Poulsen oqarpoq.
Angalasorpassuillumi apuuffissaminnut apuuttut nuannaaqaat.
Loritha Hendriksen uinilu Danmarkimiit Nuummut apriilip 28-anili utertussaagaluarput, aatsaalli ullumi, qaammatit marlungajaat utaqqereerlutik angerlarput. Tassungalu utaqqineq sakkortusimavoq:
- Ajunngeqaanga. kisianni qiartalerparput aamma paasigatsigu ilumut ippassaq qulakkeeratsigu aatsaat ippassaq unnukkut listimut ilanngunneqarsimalluta.
- Qiartalerlunga angerlarsilaarlutalu tappavanngaaniit tassami angerlarsimaffimmut uterusuumeraluarluta, Loritha Hendriksen oqarpoq.
Apuuppusimi, nuanneq?
- Ilaana. Uppernanngilarluunniit niunerput. Nuanneqaaq.
Nunatsinnut tikittut tamarmik tikinnerminniit ullut tallimassaanni coronaviruseqarnerlutik misissorteqqereernissamik tungaanut angerlarsimasussaapput.
Misissortinnerlu aatsaat coronaviruseqannginnermik takutitsippat inuiaqatigiinnut akuliussinnaallutik.
