Condoleezza Rice Mottakilu Egyptenimi ataatsimeeqatigiipput
Nunat arlallit nunanut allanut ministerii Egitsinimi Sharm el-Sheikhimi ulluni makkunani ataatsimeersuarput, Iranip USA-llu nunanut allanut ministerii aamma peqataallutik. Ministerit taakku Hotel Sheratonimi ippassaq unnukkut nereqatigiipput.
USA-mi nunanut allanut ministeri, Condoleezza Rice, Iranimi nunanut allanut ministerip, Mottaki-p, akerpiaani issiasussaasimavoq, taamaammallu ilimatsaanneqarsimavoq nunat taakku siullermeerlutik imminnut qanillattornissaat unnuup ingerlanerani immaqa piviusunngorsinnaassasoq.
Nereqatigiittussalli nerrivimmi inissaminnut inginngitsiartut Iranimi nunanut allanut ministeri, Mottaki, neriniartarfimmiit anisimavoq.
Amerikami naalagaaffimmi atorfillit oqarput, unnuk taanna nerinerup nalaani aliikkusersuisussaq, arnaq agiartartoq, qaaqqusisuminnut egitsinimiumut Mottaki-p naammagittaalliutigisimagaa, oqarluni, arnap agiartartup kjuulia aappaluttoq ingasagigamiuk nereqataasinnaanani.
- Arnaq sorleq merserisimaneraa oqarsinnaanngilanga – agiartartoq aappaluttumik kjuulilik imaluunniit USA-mi nunanut allanut ministeri, Condoleezza Rice, amerikamiut nunanut allanut ministereqarfianni oqaaseqartartoq, Sean McCormack, kinguninngua oqarpoq.
Iranimi USA-milu nunanut allanut ministerit 1980-imili ataatsimeeqatigiissimanngillat, sallunaveeqqutitut tigusaq pissutigalugu najummassimanartorsiortoqarnerata kingunerisaanik Teheranimut attaveqarneq Washingtonip taamani kipitimmagu.
