Claus Nielsen GIF-mi siulittaasutut qinigaavoq
Claus Nielsen 16-nit taaneqarpoq Frederik Lundblad 15-nit taaneqartoq ataaserlu atermik allataqarani taasisoq.
Paasissutissat taamaapput tallimanngornermi ullaap tungaa GIF-mi siulittaasussamik qinersisoqarmat siulittaasunngorniuttullu suleqatigiinnermik nangitserusupput.
- Assorujussuaq uannik taasinerit qujamasuutigaakka, Claus Nielsen KNR-mut oqarpoq.
- Frederik Lundbland GIF-mi siulersuisuni ingerlaqqippoq siulittaasussarsiornissarlu sioqqullugu isumaqatigeereerpugut kina siulittaasunngornersoq apeqqutaatinnagu suleqatigiinnerput nangissallugu, GIF-mi siulittaasunngortoq oqarpoq.
Ukioq timersorfiusoq 2022 pillugu siulersuisut nalunaarutaat ersaartaannikkut akuerineqarpoq maannalu kattuffinnik suleqateqarnerup pitsaasup nanginnissaa pillugu Claus Nielsen pisussaaffilerneqarpoq.
- Kattuffiit siulersuisuisa upernaakkut ataatsimeeqatigisarnissaat eqqukkusuppara ataatsimeersuarneq kisiat isumalluutiginagu, Claus Nielsen oqarpoq.
- GIF qanoq ingerlassinnaanerlugu eqqarsaaterpassuaqarpunga, aammali qularinngilara kattuffiit aamma timersorneq pillugu isummersuuterpassuaqartut. GIF-mi siulersuisut suleqatigalugit suliniutit kattuffiit kissaataannut naleqqussarsinnaavagut, Claus Nielsen oqarpoq.
Nammineq piumassutsimik suliniarneq eqqarsaatigalugu Nunatsinni timersorneq unammilligassaqarpoq.
- Nammineq piumassutsimik suliniarnerup nukittorsarnissaa pingaartilluinnagaraara. Suliassaqarfik taanna assut pingaarnersiuinermi qaffasittussaavoq, Claus Nielsen oqarpoq.