DR-ip pisortaa nassuertoq: Orsugiak pillugu piviusulersaarummi kisitsisit pillugit pitsaanerusumik paasissutissiissuteqarsinnaagaluarput

DR-ip suliffeqarfinnit allanit qanoq piviusulersaarummik pisisarnerminik misissuineq aallartippaa.

DR tusagassiuutinut nalunaarummi allappoq.

Piviusulersaarusiap 'Grønlands Hvide Guld'-ip DR-ikkut KNR-ikkullu sapaatiummat kingullermik aallakaatinneqartup isornartorsiorneqangaatsiarneqarnerata tusagassiuutitigullu ukkatarineqangaatsiarnerata kingorna taama nalunaaruteqarpoq.

DR-ip misissuinermi saniatigut allagaatit piviusulersaarusiap pileqqaarneranik nassuiaat aamma saqqummiunniarpaa.

- DR-ip siulersuisut allagaatimik piviusulersaarusiap 'Grønlands Hvide Guld'-ip suliarineqarneranik nassuiaataasumik saqqummiussinissaq kiisalu piviusulersaarusiat avataanit suliarineqartut, matumani pingaartumik piviusulersaarusiat tamakkiisumik ilaatigulluunniit Det Danske Filminstitutimit (DFI-mit) aningaasalerneqartut suliarineqartarnerat siunissamut ilinniutiginiarnissaat siunertaralugu misissoqqissaarneqarnissaata aallartinneqarnissaa aalajangerpaat, DR allappoq.

Kukkusumik oqallitsitsisoq

Nutaarsiassaqartitsiviup pisortaata, Sandy Frenchip oqarnera naapertorlugu DR-ip Danmarkip Kalaallit Nunaannut atassuteqarnera pillugu oqallitsitsilernissaq siunertarisimavaa. Taassuma oqarnera naapertorlugu DR-ip saqqummersitaani tamanna iluatsinneqarpoq.

Piviusulersaarutilli aallakaatinneqarnerata kingunerisaanik isornartorsiuilerneq taassuma ajuusaarutigaa.

- Tamanna pillugu uannit annerusumik ajuusaarutiginnittoqanngilaq. Pissutigalugu DR oqallinnermi qitiutinneqarpat tamanna uagut tutsuiginassusitsinnut qularnertut paasineqarpat taava uagut suliatsinnik iluatsitsilluanngitsoorpugut, Sandy French oqarpoq.

Taassumalu piviusulersaarummi aningaasatigut kisitsisit – taakku 400 milliardit – saqqummiunneqarnera naammannanilu ersarissarluarneqarsinnaasut ilanngullugu oqaatigaa.

- Nassuerutigissavara aningaasaqarnikkut taaguutit immikkoortinneqarnerat suli ersarissarnerusinnaagaluarigut immikkullu ilisimasalimmut naleqartitsineq pillugu sammiliviisoqarnerutitsisinnaagaluarluta, taanna oqarpoq.

Kultureqarnermut ministeri isornartorsiuisoq

Danskit kultureqarnermut ministeriat, Jakob Engel-Schmidt (Moderaterne) piviusulersaarusiaq pillugu Facebookikkut nammineq quppernermini aamma isornartorsiuivoq.

- Piviusulersaarusiap kaaviiaartitat iluanaarutillu assigiinngissutai ersarissarluanngimmagit paasiuminaatsilluinnarpara. Paatsiveerussaataavoq, akisussaassuseqannginneruvoq, piffissami ajornerpaami saqqummiunneqarluni. Tamanna naammaginanngilaq, taanna allappoq.

Partiit Det Konservative Folkepartiip aamma Liberal Alliancep kultureqarnermut ministeri piviusulersaarut pillugu isumasioqatiginiaraat DR tamatuma kingorna allappoq.

- Kalaallit Nunaata, USA-p Danmarkillu akornanni nunanut allanut politikki pillugu ilungersunartorsiorfimmiippugut, taamaattoqarneranilu piviusulersaarut immikkut ilisimasallit oqarnerat naapertorlugu assigiinngitsorpassuartigut paatsoornarluinnarluni eqqunngitsumik paasissutissiisoq saqqummiunneqarpoq, Det Konservativenit kultureqarnermut oqaaseqartartoq, birgiite Bergmann DR-imut oqaaseqarpoq.

Tamatuma saniatigut Dansk Folkepartiip Kalaallit Nunaannut tunngasunik oqaaseqartartuata, Alex Agrendtsenip piviusulersaarut sallusoq, uukapaatitsiniarnerusoq tatiginanngitsorlu oqaatigaa.