Carter Sadowick saqqarmiumik ataatsimik tunniussinissaminut piareersimagami amerlasoorpassuarnik tunisittoq
- Saqqarmiunik isiginnittariaasinnut allannguivoq.
Alaskamit Inuit Pinnguaataannik nunanut allanut unammisartut sungiusaasuat, Candice Parker Northwest Territoriesimit nerrivimmi arsaarartartumik, Carter Sadowickimik, aqqanilinnik ukiulimmik naapitsinermi kingorna oqarpoq.
Taakku tamarmik Canadami illoqarfimmi Fort McMurrayimi sapaatip akunnerani matumani Arctic Winter Gamesertoqarnerani peqataapput. Taakkulu marluk imminnut oqaasissaqarfingaatsiarnissaat immaqa naatsorsuutigineqarsinnaanngikkaluarpoq.
Arctic Winter Games
Arctic Winter Games kingullermik 2018-imi aaqqissuunneqarpoq. Tamatuma kingorna Covid-19 pissutigalugu taamaatiinnarneqartaarpoq.
Arctic Winter Games Canadami nunap immikkoortuani Albertami Wood Buffalumi ukioq manna aaqqissuunneqarpoq.
Nunatsinnit timersortartut 67-it peqataapput.
Nunatsinni timersortartut Arctic Sportsimi, Dene Gamesimi, volleyballimi, sulorarnermi, nerrivimmi arsaararnermi snowboardimilu peqataassapput.
Nunatta peqataanerata saniatigut Alaskamit, Alberta Northimit, Northwest Territoriesimit, Nunavik-Quebecimit, Nunavummit, Sápmimit aamma Yukonimit peqataasoqassaaq.
Timersortartut katillugit 1800-it sinneqartut peqataapput.
Ataasinngornermili ullaakkut Alaskap Northwest Territoriesillu timersortartuisa timersortarfimmut ingerlanneqarnissaminnut utaqqinerminni nunarsuaat naapipput.
Candice Parkerip timersortartut ilaat saqqarmiunik, Arctic Winter Gamesertoqarnerani ileqqutoqaq malillugu paarlaasseqatigiittut maluginiarpaa.
Saqqarmiut savimiunipput suliffeqarfinnik imaluunniit timersoqatigiiffinnik ilisarnaateqarput. Tunuatigut akittartuusaqarpoq, taamaalilluni saqqarmiut assersuutigalugu kavaajanut taskinulluunniit ikkunneqarsinnaalluni.
Taassuma aqqanilinnik ukiulik, Carter Sadowick saqqarmiumik paarlaaqatigerusunneraani aperaa.
Amerlasuut saqqarmiumik ujameqartarput, naallu Candice Parker saqqarmiunik amerlasoorpassuarnik katersisimagaluarluni ataasiinnaq ujameraa, tamannalu nerrivimmi arsaarartartuaqqap maluginiarpaa.
Taamaammat taassuma paarlaaqatigiinnani pigisaminik tunniussiniarluni aalajangerpaa, aamma naak nammineq tallimaannarnik peqaraluarluni. Taassumami saqqarmiuutini tamarmik Arctic Winter Gameseriartornerminni timmisartumi annaasimavai.
Carter Sadowick aperigaanni sooq saqqarmiuutiminik tunniussinissani aalajangerneraa tuini qullaamiarpai.
- Suuteqanngimmat nalligigakku, taanna oqarpoq.
Misigissuseq taanna nammineq ilisarisinnaalluarpaa.
Saqqarmiunik paarlaasseqatigiinneq qanoq siunertaqarpa?
MacDonald Island Parkimi timersortarfinni ingerlaaraanni timersortartut unamminissaminnut utaqqinerminni saqqarmiunik paarlaateqatigiittut takuneqarsinnaapput.
Arctic Winter Gamesertoqarnissaanut saqqarmiut assigiinngitsorpassuit sananeqartarput. Aaqqissuisunit saqqarmiut, timersoqatigiiffinnit assigiinngitsunit saqqarmiut kiisalu holdit namminneq saqqarmiui. Saqqarmiumillu pissarsiarerusutamik paarlaateqatigiinniartoqartarpoq.
Ilaat saqqarmiunik siornameersunit pissarsiaqarusuttarput. Ilaat ukioq mannamit nutaanik pissarsiaqarusuttarput, ilaallu aalajangersimaqqissaartunik katersiniarsarisarput.
AAMMA ATUARUK Eqqillit Pinnguaataat Inuit Pinnguaataallu suuppat?
Janet Paceyip MacDonald Island Parkimi saqqarmiorpassuaateqartup oqarnera naapertorlugu saqqarmiunik paarlaasseqatigiinneq inunnik allanik naapitsinissamut periarfissatsialaavoq.
- Inuit assigiimmik oqaaseqanngitsut akornanni sunniivigineqatigiinnissamut periarfissaalluarpoq. Saqqarmiunik paarlaanniarnermi oqaatsit atorneqartariaqanngillat, taanna oqarpoq.
Janet Pacey ukioq mannami saqqarmiut ilaallu. Assi: KNR.
Janet Pacey ileqqutoqaq 2001-imi CBC-mi (Canadian Broadcasting Corporation) sulitilluni paasivaa. Taakkumi ukiup tullissaani unammisoqarnissaanut ilusilersueqqusipput.
Taanna siullerpaamik Arctic Winter Gamesimut 2004-mi peqataagami saqqarmiunik paarlaasseqatigiinneq qanoq ingerlasarnersoq ilikkarpaa.
- 90 minutsit paarlaasseqatigiippunga, taamaalillungalu pinngitsoorsinnaajunnaarlugit, Northwest Territoriesimi Yellowknifemi najugalik, Janet Pacey oqarpoq.
Taannalu CBC-mi suliunnaareersimagaluartoq CBC-p saqqarmiuarassaminnik ilusilersuisussatut suli imittarpaat. Taannalu qujassutigisarpaa. Taasumami ileqqutoqqami peqataanissani nuannaraa.
- Nuannaraara. Unnuit tamaasa angerlaraangama quisissimasarpunga, nerriviup paarlaassivimi issiavittaani ingilluni oqarpoq. Taassumalu sapaatiummat unamminerit aallartimmatali aatsaat ingissimanini oqaatigaa.
Tamannalu paasineqarsinnaalluarpoq. Janet Paceymmi paarlaasseqatigiiffia soqutigineqarluarpoq. Tassanilu aningaasanik akiliisoqarsinnaanngilaq. Saqqarmiu saqqarmiumik paarlaasseqatigiissutigineqassaaq.
Janet Paceyp apersorneqarnini unitsitallappaa, angummi paarlaasseqatigiffianut takkuppoq, paarlaasseqatigiilerlutillu.
- Pigilerusutannik peqarpoq, uangalu taassuma pigilerusutaanik peqarlunga. Taama paarlaasseqatigiittoqartarpoq, Janet Pacey qungujulluni oqarpoq.
Carterimut saqqarmiut
Nerrivimmi arsaarartartuaraq, Carter Sadowick uterfigeqqeriarutsigu.
Tassumami Alaskamit sungiusaasoq saqqarmiuutiminik naleqarluartunik tuniniarlugu neqeroorfigeqqammerluinnarpaa, taassumali Candice Parker naammattorsuarnik saqqarmiuuteqareersoq ilisimanngilaa, taamaammat neqeroornera uummatiminut kissatsitsigaluartoq taassuma saqqarmiuutaa tigunianngilaa.
Candice Parker saqqarmiut Carter Sadowickimut tunniukkusutami ilaallu.
- Pisariaqartinnagu oqarfigaara, allamillu tunniussinnaasannik nassaassullugu, Candice Parker oqarpoq.
Carter Sadowickip Canadice Parker saqqarmiorlu tunniussani eqqaallugu qungujuppoq.
- Nuannaarutigaara, aqqanilinnik ukiulik, nerrivimmi arsaarartartoq oqarpoq.
Taassuma tamatuma kingorna saqqarmiut amerlanerusut pissarsiarai. Minnerunngitsumillu saqqarmiunik ‘fair play’-inik marlunnik tunineqarsimalluni. Saqqarmiup aappaa ilisarisimanngisaminut nammineq saqqarmiuutiminik tunniussiniarlugu iliuuseqarnini pissutigalugu pissarsiaraa.
Arctic Winter Gamesimik aaqqissuisut saqqarmiunik ‘fair play’-inik tunniussaqartartuupput.
Carter Sadowickillu ilisimanngilaa Canadice Parker nerrivimmi arsaarartartuaraq pillugu nammineq sungiusartakkami aamma Inuit Pinnguaataannik timersortartut akornanni oqaluttuaqattaarsimanera, taakkunanngalu amerlasuut Carter Sadowickimut saqqarmiumik tunniusserusupput.
Taamaammat saqqarmiunik amigaateqalerallartussaanngilaq. Candice Parkerip tamanna ‘Carterimut saqqarmiunik’-mik taagorpaa.
- Kina aqqanilinnik ukiulik saqqarmiumik taama tunniusserusuttoq?
- Tamatuma kingorna saqqarmiunik paarlaaqatiginnanga arlalinnik tunniussaqarpunga. Tunniussivigineqarnissaq eqqarsaatiginagu tunissutitut tunniussilluni nuannerneruvoq, Alaskamit Inuit Pinnguaataannik sungiusaasoq, Candice Parker oqarpoq.
Eqqumiitsuliannguaq
MacDonald Island Parkimi paarlaasseqatigiiffimmi Janet Paceyip ileqqutoqaq oqaluttuareqqippaa.
Taassuma saqqarmiut ataatsimut atasut CBC-mut 2018-imi ilusilersueqataaffigai. Saqqarmiut tamarmik assigiinngitsuupput, taakkuli ataatsimoortikkaanni aalajangersimasumik assiliartaqartarlutik.
Unamminerni ulluni tamani ataatsimoortitassamut ataatsimik tunniussisarput, pissarsiniaraannilu piffissami aalajangersimasumi takkuttoqartartussaalluni.
- Inuit siuleriiaattorpassuarniittarput, saqqarmiunnanngitsoortullu ugguangaatsiartarlutik, Janet Pacey oqarpoq.
AAMMA ATUARUK Arctic Winter Gameseqataasortatsinni aqqanillit ujamminnattut
Oqaluttuaq taanna inuit katersinissaminnut qanoq tiguartisimatiginerannut takussutissaalluarpoq. Paarlaasseqatigiinnissamut timersortartuuneq, sungiusaasuuneq, aaqqissuisuuneq imaluunniit isiginnaariartuuneq apeqqutaanani tamarmik tikilluaqqusaapput.
- Unamminernit eqqaassutissaqarnissaq nuannerpoq. Imaassinnaavoq tilluusaqarluni angerlartoqartoq, kisianni saqqarmiut piffissami sivisuumi pigineqarsinnaapput.
- Saqqarmiut tamarmik eqqumiitsuliannguupput, Janet Pacey oqarpoq.
Taassumalu saqqarmiumik paarlaasseqatigiinnermut periuseqartoq oqaluttuaraa. Assersuutigalugu allat saqqarmiuutaat apereqqaartigani attoqqusaanngillaq. Aamma allat paarlaasseqatigiinniarnerannut unitsitseqqusaanngilaq.
Kalaallit Nunaanni Timersoqatigiiffiit Kattuffiata Arctic Winter Gamesimut saqqarmiut aamma ilusilersortinnikuuai. Ilusilersukkat taakku 2019-imeersuupput, taakkulu 2020-mi unamminernut nassatarisussaagalurlugit. Unamminissalli Covid-19 pissutigalugu taamaatiinnarneqarnikuupput.
Ukioq mannali peqataapput, taakkulu tamarmik pigilersimagaanni iglotut iluseqartarlutik.
