Carla Sands Pituffik pillugu suliaminut nersornaasigaasoq
Carla Sands USA-p Danmarkimi aallartitaatut præsidentip illorsuani paarlaattoqarnerani atorfeqarunnaarpoq.
Tamannalu nersornaasigaaneranik naggaserneqarpoq. Tassami Carla Sands USA-mi innuttaasunut atorfilittaanngitsunut nersornaasiunneqartartuni akimanerpaamik nersornaasigaavoq.
USA-p naalagaaffeqatigiillu isumannaallisaanikkut suleqatigiinnerulernissaannik suliaminut nersornaasigaasoq, USA-p Københavnimi aallartitaqarfia inunnut attaveqaatinut ilisimatitsivoq.
AAMMA ATUARUK Carla Sands isumaqatigiissut pillugu: Kalaallit Nunaat USA-mut saniliussaaq nukittooq
Ingammik Pituffimmut tunngasuni suliani pillugit nersornaasigaasoq, aallartitaqarfik ilisimatitsivoq.
USA-p aningaasatigut ingerlalluartunik, tamatumani nunatsinnik, sanileqarnini, iluaqutigissagaa, Carla Sandsip USA-p Danmarkimi aallartitaatut 2017-imi atorfinittup arlaleriarluni oqaatiginikuuaa.
Pituffimmi sullissinissamut isumaqatigiissummut piumasaqaatissat pillugit ukiorpassuarni isumaqatigiinniartoqareersorlu, taana sullissinissamut isumaqatigiissummut ukiaq atsioqataavoq.
USA-mi præsidentimik qinersinermi eqqunngitsuliortoqarsimasoq, Carla Sands Twitterimi novembarip ulluisa arfineq-aappaanni ilisimatitsivoq. Præsident Trumpimut taasinini kisitsinermi aamma ilanngunneqarsimanngitsoq, taanna allappoq.
Joe Biden USA-mi præsidentinngoreeriaruni amerikamiut naalagaaffeqatigiinni aallartitaattut atorfinittussamik toqqaassaaq.
