Canadami orpippassuit ikuallannerisa nunatta qilaa aappillersimatittaaraat

Nunatta qilaa seqernup tarrinnerani ulluni makkunani aappillersimaartaarpoq.

Aamma seqernup nuinerani ulluni makkunani taamaattaarpoq.

Nunattalu qilaata aappillersimaartaarnera pinnarineqaqaaq, taamaattaarnerali taaqqornartumik peqquteqarpoq. Canadamimi orpippassuit ikuallannerisa nunatta qilaa aappillersimatittaarpaat.

Canadami aasaq manna nunarsuup avannaata sinneranitulli kiarujussuarpoq, tamannalu tasamani orpippassuit ikuallannerannik kinguneqarpoq.

Tassa Canadami orpippassuit tasamani sumiiffinni 1000-nit amerlanerusuni maanna ikuallapput.

Tasamanilu orpippassuit ikuallannerannit pujoq nunatsinnut annguppoq.

- Canadami orpippassuit ikuallannerannit pujoq annguppoq. Qutsimmat pujorsunninngilaq. Nunattali qilaa iseriattaarlunilu seqernup tarrinnerani aappillersimaartaarpoq, Danmarkimi silasiorfik Danmarks Meteorologiske Institutip Nuummi silasiorfianeersoq (DMI) Jens Lindskjold oqarpoq.

Canadami orpippassuit ikuallannerannit putsup nunatsinnukarnera nittartakkami uani isiginnaarsinnaavat.

Qulisimanermiit aappillersimaarnermut

Nunatta qilaa Canadami orpippassuit ikuallannerannit sunnertittareerpoq. Tasamanimi orpippassuit juulip aallartinnerani ikuallannerannit pujoq ussissoq Kujataanut aamma annguppoq.

- Pujoq ussittoq nunatsinnut anngummat, seqineq iserissernerani ersigunnaartaarpoq. Iseriattuinnanngoraangallu ersigunnaavittarpoq. Pujorlu nunatsinnut ulluni makkunani anngusimaartoq usserujussuanngimmat nunatta qilaa aappillersimatittaaginnarpaa, Jens Lindskjold oqarpoq.

Nunatta qilaata ullut tulliuttut qaangiuppata aappillersimaartaarunnaassaassaaq. Jens Lindskjoldilli oqarnera naapertorlugu unnugu ullaassarulu aappillersimaaqqissaaq.

- Ullumimi nuiakimmat qilak seqernup unnugu tarrinnerani ullaassarulu nuinerani aappillersimaaqqissaaq. Kingornali nuississaaq, taanna oqarpoq.

Sapaatit akunnerata naanerata kingorna iseriappallaarunnaariarpat, nunatta qilaa aappillersimaartaarunnaarniartussaassaaq.