Canadami nunap inuiisa ammip qalipaataa tunngavigalugu immikkoortitaasarnerat sammineqartoq
Canadami nunap inuii, tassaasut naggueqatigiit Inuit, Métisit indianerillu immikkoortitaanermik annertuumik atugaqarput. Canadami nunap inuiisa sutigut tamatigungajak USA-mi qernertumik amilinnut naleqqiullugit annerusumik immikkoortitaasarnerat atuagassiap Maclean’s-ip kisitsisitigut paasissutissat atorlugit takutitassiaraa.
Assersuutigalugu Canadami nunap inuiisa akornanni suliffiissaaleqisut 14%-iupput USA-mi qernertumik amillit akornanni 11%-iinnaallutik. Aamma nunap inuiisa inuartarineqartartut Canadami allanut naleqqiullugit pingasoriaammik amerlanerupput. Aamma agguaqatigiissillugu inuuneqqortussusiat ukiunik qulinik sivikinneruvoq, aammalu amerikamiunut qernertumik amilinnut naleqqiullugu sivikinnerulluni.
AAMMA ATUARUK Canada: Meeqqanik misileraanernut qulaajaanerit nutaat
Kisitsisit saqqummiunneqartut annilaarnartinneqaraluarlutik tupaallaatigineqarpallaanngillat. Pingaartumimmi indianerit métisillu qangaaniilli oqaatigiuarpaat Canadap oqaluttuarisaanerani inuiannik taakkuninnga toqoraasoqartarsimasoq, ajortuliornerillu suli pisartut.
Nunap inuiisa akornanni arnat inuartarineqanngikkunik periarfeerunneqartartut maannakkorpiaq sammineqartupilussuupput. Aammattaaq najugaqarfiutigalutik atuarfinni pisarsimasut amiilaarnartut qulaajaaffigineqarput, naggueqatigiit inuit ulluinnarni ajornartorsiungaarput naammattunik nerisassaqaratik indianereqarfinnilu arlalinni imermik minguitsumik aamma amigaateqartoqarluni. Assigiinngisitsisoqarneranut aammalu ammip qalipaataanik immikkoortitsisoqarneranut assersuutissarpassuaqarpoq.
AAMMA ATUARUK Nunavummi naggueqativut nerisassaaleqiuarsinnartut
Canadamiorpassuillu suli isumaqarput nunap inuii tamarmik tassaasut imerajuttut, persutaasartut suliffissaaleqisullu.
Nunap immikkoortuani Manitobami illoqarfiit pingaarnersaat Winnipeg illoqarfinni ammip qalipaataanik immikkoortitsiffiunerpaajusutut atugassiamit toqqarneqarsimavoq. Winnipegip borgmestertaava Bowman, métisiusoq, atugassiami allaaserisaq tusaramiuk qiasimavoq. Kamammik pilersitsivoq aammali ajornartorsiutip kanngunarluinnartup tigussaasumik iliuuseqarfiginissaanut piumassuseqalersitsilluni.
AAMMA ATUARUK Canadami borgmesterinngortoq nunap inuiisa ilagaat