Assi: Michael Swan/Flickr Creative Commons

Nunavummi naggueqativut nerisassaaleqiuarsinnartut

Naammaleqaaq, Rankin Inletip borgmesteriata tullia, Sam Tutanuak, Canadami nunap inoqqaavisa tv-qarfiani APTN-imi apersorneqarluni qiaatigaluni taama oqarpoq.

- Canada nunanut ajornartorsiortunut ikiuutissatut dollarsinik millioninik nassiussuisarpoq namminerli innuttaasuni ikiorsinnaanagit, Sam Tutanuak oqarpoq.
 
APTN-ip nutaarsiassaataani Rankin Inletimi - Kangirliniq-mi - nerisassaaleqisoqarnera sammineqartuarsinnarpoq, ilaatigut utoqqaat nerisassaqarniarlutik illoqarfiup eqqaavissuani eqqaavissiortariaqariartut oqaluttuarineqarlutik.
 
- Ajornartorsiut ima angitigaaq, allaat inuit nerisassanik tillinniartalersimallutik, nerisassat pisiniarfinni akisuallaalersimammata. Aamma piniarneq aalisarnerlu akisuallaalersimapput, Sam Tutanuak erseqqissaavoq.
 
Nunavummi inatsisartunut ilaasortap Leona Aqlukkap, Nunavummiut nerisassaqarniarnissaannut akillu naammaginartuutinnissaannut Canadami naalakkersuisut annertuumik suliniuteqareersimaneralugit oqaaseqartarnini ingerlatiinnarpaa.


Naalagaaffiit Peqatigiit: Nunap inuii nunani ineriartortitanitulli atugaqarput
Kisitsisitigulli paasissutissat allarluinnarmik takutitsipput taamatuttaaq Naalagaaffiit Peqatigiit allatut oqalullutik. Naalagaaffiit Peqatigiit immikkut aallartitaat, Olivier de Schutter, nunap inoqqaavisa inuuniarnikkut atugaannik misissuiartorluni Canadamut ukiut marluk matuma siorna tikippoq. Taassumalu nalunaarusiaani Canadami nunap inoqqaavisa assigiinngitsorpassuartigut nunani ineriartortitsiffiusuni atukkat assinginik atugaqarlutik inuusut oqaatigineqarpoq. Kisitsisitigut paasissutissat takutippaat Nunavummi naggueqatigiit Inuit 70%-ii - tassalu pingasunik sisamararterutaat - ullut tamaasa naammattumik nerisaqarneq-ajortut.
 
Rankin Inletimi utoqqaat ilaat, Lucy Wiebe, APTN-imut oqaluttuarpoq angajoqqaat meeqqatik nerisassaqartinniarlugit ilaatigut nammineq nerinngitsuuinnartartut.
 
Borgmesterip tulliata Sam Tutanuakip erseqqissaatigaa taamatut inissisimasoqarnerata kingunerisaanik naggueqatigiit inuit ilarpassui timikkuinnaq napparsimaleratik aamma tarnikkut napparsimalersartut, nerisassaaleqiuarneq innuttaasunut misigissutsikkut annertuumik nammatassiimmat.

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat