Canadami borgmesterinngortoq nunap inuiisa ilagaat
Winnipegimi borgmesterinngortoq tassaavoq Brian Bowman, 42-nik ukioqartoq, taannalu Metisiuvoq Canadami nunap inuiisa ilaat. Canadap oqaluttuarisaanera siullerpaamik nunap inuiinik borgmesterinngortoqarpoq. Indianerinik Inunnillu borgmestereqareeraluarpoq, taakkuli avannarpasinnerusumi illoqarfeeqqani nunaqarfinnilu borgmesteriupput.
Matumanili pineqartoq tassaavoq angut nunap immikkoortuani Manitobami illoqarfiit pingaarnersaanni Winnipegimi borgmesteritut qinerneqartoq. Illoqarfissuaq 660.000-inik innuttaqarpoq, taakkunanngalu nunap inoqqaavi 76.000-it missaanniillutik, taamaasillunilu aamma Canadami illoqarfinni nunap inoqqaavinik innuttaasoqarnerpaalluni.
Aamma atuaruk Canadami nunap inoqqaavi amerligaluttuinnarput
Amerlanersaat indianeriupput aammali Inuit arlaqarlutik. Metisit 42.000-it missaanniipput. Metisit tassaapput nunap inoqqaavi indianerit, franskinit skottinillu akusat. Illoqarfimmi oqaatsit assigiinngitsut hunnorujunit amerlanerusut aamma atorneqarput.
Aamma atuaruk Naggueqatitta arnartaasa tammaaneqartarneri pillugit suliniartoqalerpoq
Winnipegimi borgmesterinngoqqammersoq Canadami aviisip nuna tamakkerlugu saqqummersartup National Postip saqqaani "Canadami borgmesterit pingaaruteqarnersaattut" taaneqarpoq.
Brian Bowman borgmesteritut ivertinneqarami indianerit Ojibwayit utoqqartaannik qaaqqussivoq taannalu qinnussitillugu. Taamatullu pisoqareermat kommunalbestyrelsimut ilaasortat tamaasa puussiaaqqamik tupamik imalimmik tunivai, tassalu indianerit ileqquusumik ilassinnittarnerat malillugu.
Aamma atuaruk Canadami nunat inoqqaavisa arnartai periarfeerunneqartartut toqutaasartullu pillugit misissuisoqanngilaq
Winnipegimi kommunip allaffissuani periaatsit nutaat taamaasillutik atugaalerput. Tamannalu nunap inoqqaavisa nunasisullu akornanni pissuseqatigiinnermut iluaqutaasinnaassanerpa? Borgmesterip Brian Bowmanip, Canadamit tamarmit soqutigineqarluni malittarineqartussanngortup, tamanna neriuutigaa.