Canadami nunap inoqqaavi amerligaluttuinnarput

Canadami nunap inoqqaavi amerliartuinnavipput, Canadallu aningaasarsiorneranut pingaaruteqaleraluttuinnarlutik.

Canadami inuussutissarsiutinik ingerlatsisut Montrealimi ataatsimeersualeruttorput, Canadamilu nunap inoqqaavisa inuussutissarsiornermut siunnersuisoqatigiivini, the Canadian Council for Aboriginal Businessimi, pisortaq Jean Paul Gladu oqalugiartunut tassani ilaalluni.

Canadami nunap inoqqaavisa inuussutissarsiornikkut piumasarisaasa piorsaavigineqarnissaat, taassuma sulissutigaa. Gladu indianeriuvoq, Canadami nunap immikkoortuani Ontariomi indianerit Anishinabeemik taagutillit ilagalugit.

Canadami naggueqatigiit Inuit, métisit indianerillu Canadami innuttaasut akornanni 5 procentit missaanniipput, affaasali missaat suli 25-liisimanngillat, Canadamilu nunap inoqqaavi ukiut qulit qaangiuppata innuttaasut akornanni amerlassutsimikkut 10 procentinngorsimanissaat ilimagineqarpoq, taakkualu Canadap aningaasarsiorneranut pingaaruteqaleraluttuinnarnissaat ilimagineqarluni.

Canadami nunap inoqqaavi Canadap inuussutissarsiornikkut isertitaat amerligaluttuinnartut, Jean Paul Gladup Radioaviisimut oqaatigaa, siunissamilu aamma suli amerligaluttuinnarnissaat ilimagalugu.
Aningaasat 170 milliardit koruunit missaat Canadami nunap inoqqaavisa ukiumut kaaviiaartitarisaraat, Jean Paul Gladup oqaatigaa.