Canadami nunat inoqqaavisa arnartai periarfeerunneqartartut toqutaasartullu pillugit misissuisoqanngilaq

Canadami illoqarfiit ilaanni Winnipegimi indianerit arnartaasa ilaannik toqutseriaraluartoqarnera pissutaalluni Canadami maanna aalassassimaartoqaqaaq.

Indianeri arnaq inuusuttoq 16-inik ukiulik Rinelle Harper, Winnipegimi atuartuuvoq, angajoqqaavisali Manitobami Garden Hill First Nationimit sapaatip-akunnerata siuliani tikeraarnerat pissutaalluni ullut ilaanni atuanngiffeqarsinnaatitaasimalluni.

Atuanngiffeqarnermili nalaani alianartumik pisoqarpoq. Angutinit marlunnit saassunneqarpoq, pinngitsaalillunilu arneriffigineqarluni. Taamatut pineqarnermi kingorna Assiniboinep kuuanut iginneqarpoq.

Atisaqarpianngikkaluarluarluni kuummit qaqisinnaasimavoq. Angutilli saassussisut marluk taakku suli qimagussimanngillat, pinngitsaalillugulu arneriffigeqqippaat, persuttaqqillugulu, kuummullu igeqqillugu.

Naallu qiulluni ipingajakkaluarluni Rinelle Harper kuummit qaqeqqissinnaasimavoq. Ilaqutai politiinukarsimapput, tusagassiuutinullu aamma saassimallutik. Aqqa assialu Canadami tamanut saqqummiussimavaat, saassussisut sumiissusersinissaat siunertaasimalluni. Saassussisut kingorna tigusarineqarput.

Pisut Canadami innuttaasut quarsaarutigilluinnarpaat, tassami arnaq nunap inoqqaavineersoq ilisimaneqanngitsoq saassunneqarani, tamanit ilisimaneqalersimasoq saassunneqarpoq. Rinelle Harper, Pakistanimi arnat inuttut pisinnaatitaaffiinik ilungersuutiginnittumut Malala Youzafsaimut maanna sanilliunneqartalerpoq.