Canada: Meeqqanik misileraanernut qulaajaanerit nutaat

Indianerit, inuit metisillu meerartaasa Canadami atuarfinni najugaqarfiutigisuni tusaamanerlutaaqisuni misigisimasaannik eqqumiilluinnartunik qulaajarnerit suli ingerlapput.
januaarip 17-at 2015 13:00
Nutserisoq Erna Lynge

Manitobami eqqortussamut saammaasseqatigiinnissamullu ataatsimiititaliarsuarmi pisortaq Ry Moran, TV-qarfimmut APT-imut oqarpoq ataatsimiititaliarsuaq toqqorsivinni allattugaatinik nutaanik nassaarsimasut, atuarfinni najugaqarfiutigisuni ukiut hundredikkuutaat siuliini najugaqartunut misilittaatigineqarsimasut pillugit.

 

Misileraanerit ullutsinni tusassallugit eqqumiissaqaat, sorsunnerulli nalaani 1940-41-mi ilumoorunneqarsimassapput.  Nunap inoqqaavisa meerartaat tarnimikkut qanoq nukittutiginersut misileraatigineqarsimapput. Ima paasillugu; meeqqat misiginnittaatsimikkut malussarissutsimikkullu allat piginngisaannik peqarnersut? Aammalu eqqarsaatitigut imminnut attaveqatigiissinnaanersut, tassa telepati atorlugu.

 

Tamatuma suna siunertarisimaneraa Ry Morganip ilisimanngilaa, eqqarsarlunili ilisimatusartut eqqarsarsimassasut tarnikkut piginnaasat imaassinnaasoq sorsunnerup nalaani iluaqutaasinnaassasut, immaqa kilitsissiatut?

 

Saammaasseqatigiinnissaq pillugu ataatsimiititaliarsuup sulinermini aamma paasisimavaa aamma allanik misileraasoqarsimasoq: soorlu 1950-ikkunni meeqqat perlersiiarineqartarsimapput. Ukiunilu taakkunani aamma nakorsat misileraasarsimapput inuit meerartaasa amii meeqqanut allanut nuuttarlugit.

 

Eqqortussamut saammaasseqatigiinnissamullu ataatsimiititaliarsuup pisortaata Ry Moranip oqarneratut... Paasiniaalluta sulinitsinni nalunaajaatitigullu saqqumerartutigut paasisagut eqqumiilluinnartut killeqanngillat.