TV-qarfik: Canadami nunap inuii Kinap aningaasaliiniarneranut mianersoqquneqarput
Canadap avannaani nunap inuii nunanut pissaanilissuarnut soorlu Ruslandimut Kinamullu isumaqatigiissusiornissaq mianersorfigisariaqaraat, Canadami nutaarsiassaqartitsivik CBS allaaserinnippoq.
Mianersoqqusisut tassaapput Canadami paasiniaasartoqatigiit CSIS. CSIS-ikkut nunap inuiisa Kinap Ruslandilluuniit aningaasaliiniarnerinut mianersoqqusipput. Mianersoqqussuteqarneq tv-qarfimmi CBS-imi tusagassiortut paasiniaaneranni qulaajarneqarpoq.
Canadap avannaa attaveqaasersuutitigut nunap sinneranut naleqqiulluni kinguussaaqqavoq. Aningaasaliissutit amigaataanerannik pissuteqarpoq.
Kisianni suliniaqatigiiffiup Inuit Tapiriit Kanatamip siulittaasua Natan Obed, naggueqatigiinnik 65.000-inik Canadamiittunik tunuliaqutaqartoq isumaqarpoq CSIS-ikkut paasissutissanik isertuussanik imminnut – nunap inuiisa siuttuinut - saqqummiussaqarnissamut tunuarsimaarpallaartartut.
- Ullut tamaviisa aalajangiisarpugut, immaqa paasissutissanik tamakkiisuunik tunineqartanngikkaluarluta – soorlu nunanit allanit sioorasaarinernik eqqarsaatersuutinillu, Obed CBC Newsimut oqarpoq.
Canadami oqartussat Issittumi attaveqaasersuutinut atatillugu aningaasaliisarnerat naammanngimmat naggueqatigiit inuit allaninngaanniit aningaasassarsiortariaqartartut, Natan Obed ilisimatitsivoq.
Kinap Kalaallit Nunaanni arlaleriarluni attaveqaasersuuteqarnermut atatillugu soqutigisaqarnera tusartareerparput. Soorlu Ivittuuni sakkutooqarfiusimasup Kinami suliffeqarfiup 2016-imi atulerusukkaluarmagu.
Sakkutooqarfik 2012-imi matusoq Danmarkimi illersornissaqarfiup tuniniarnikuugaluarpaa. Kisianni Kinamiut soqutiginninnerat tusarliunneqarmat sakkutooqarfiusimasoq Illersornissaqarfiup nammineq atoqqilerpaa.
Danmarkimi statsministeriusimasup Lars Løkke Rasmussenip – Kinamiut suliffeqarfiata Kalaallit Nunaanni mittarfinnik amerlisaaniarnermut atatillugu 2018-imi aningaasaliiniarnera pinngitsoortippaa.
Tassunga taarsiullugu Danmarkip naalagaaffia mittarfiliornissanut atatillugu suliffeqarfimut Kalaallit Airports-imut piginneqataalerput.
Danmarkimi Illersornissamut tunngasuni paasiniaasartoqatigiit Forsvarets Efterretningstjeneste – Kalaallit Nunaat Kinamiit Ruslandimiillu aningaasaliinernik annertuunik akuersissuteqarnissaanut mianersoqquteqartareerput.
