BSUp illuutai neriunartoqarput

Aningaasat illunut BSU malillugu illuutillinnit aningaasatigut isertitakinnerusunut illuutimillu iluarsartuunneqarnissaannut akissaqanngitsunut atorneqassapput. 

Siunnersuut inatsisartuni ippassaq oqaluuserineqarmat tapersersorluarneqarpoq aamma tamatut isumaqarpoq Ineqarnermut Naalakkersuisoq Jens B. Frederiksen.

Siunnersuut aaqqivigineqarumaartoq ineqarnermut Naalakkersuisup qularutiginngilaa, naak partiit aallaavii assiigiinngitsuugaluartut.

BSU-mi illuutillit ukiumut 180.000 kr-nit isertitakinnerusut illuutimi iluarsartuunneqarnissaannut tapiiffigineqartarnissaat siunnersuutigineqarpoq.

BSU-mi illuutillit tapiiffigineqartarnerat pillugu inatsisartuni oqallinnermi partiit amerlanerussuteqartut  taperseerpalaartumik nipeqarnerat siunnersuuteqartup Anders B. Olsen isumalluarnartutut taavaa.

BSU-mi illuutit iluarsartuunneqarnissaannut aningaasanik atukkiisoqartassanersoq imaluunnniit tapiissutinik tunniussisoqartassanersoq inatsisartut oqallinneranni
isumaqatigiittoqanngilaq. Atukkiussisoqartalissappat ineqarnermut naalakkersuisoqarfimmi allaffissornikkut suleriaatsit inatsisillu allannguuteqassapput.

Taarsigassarsisoqartalissappat, BSU pillugu inatsisip allanngortilaarneqarnissaa pisariaqassassoq, Ineqarnermut Naalakkersuisoq oqarpoq. Taarsigassarsisarneq atuutilissappat Ineqarnermut Naalakkersuisoqarfimmi allaffissornikkut periutsit allanngortinneqassapput, aningaasat atukkiunneqartut utertinneqarnissaat pillugu, Jens B. Frederiksen oqarpoq.

BSU-mi illuutillit 100.000 kr tikilllugit tapiiffigineqartarnissaat siunnersuutigineqarpoq.

Taakkuali ikippallaartut IA sinnerlugit inatsisartuni ilaasortaq Olga. P. Berthelsen isumaqarpoq, taakkualu marloriaatinngorlugit 200.000 koruunit tapiissutigineqartarnissaat kissaatiginartinnerullugu.

Siunnersuut Sanaartornermut Avatangiisinullu Ataatsimiititaliamut innersuunneqarpoq