Bruxelles: EU-p Nuummi allaffiani pingasuniit tallimanut sulisoqarnissamik pilersaaruteqartoq

Europa-Kommissionip allaffia Nuummi ammaruni pingasunit tallimanut sulisoqassaaq.

Tamanna naatsorsuutaasoq, EU-p nunanut allanut tunngasunut tusagassiinermut immikkoortortaqarfia nalunaaruteqarpoq.

EU-lli Nuummi allaffeqalerluni Issittumi najuutilernissaa qulakkeeqqagaluartoq suli inissitassaqarpoq. Allaffiup qaqugu ammarnissaa ilaatigut suli aalajangerneqanngilaq.

- Allaffimmut tunngatillugu mikisualuit, ilaatigut piffissamut pilersaarut qanorlu akeqassanerata inissinnissaa, suli amigaataapput.

- Allaffiulli pingasuniit tallimanut sulisoqarnissaa naatsorsuutigaarput, EU-p nunanut allanut tunngasunut tusagassiinermut immikkoortortaqarfia KNR-imut allakkatigut akissuteqarluni nalunaaruteqarpoq.

Suleqatigiinnissamut periarfissat nutaat

Allaffiup EU-p nunattalu isumaqatigiissutaanni ilinniartitaanermut tunngasut aningaasartai ilaatigut aqussavai.

AAMMA ATUARUK Múte EU-p allaffissaa pillugu: Ineriartortitsinissamut periarfissatsialak

EU-miillu nunatsinnut tapiissutaasa aqunnerisa saniatigut illuatungeriit soqutigisaqaqatigiiffiini Naalakkersuisunik suleqateqarneq aamma pitsanngorsaassavaa.

- Kalaallit Nunaat pingaartumik ilinniartitaanermi suleqatigereerparput, suleqatigiinnerli taanna susassaqarfinnut allanut aamma siammarterniartarput, nunanut allanut tunngasunut tusagassiinermut immikkoortortaqarfik KNR-imut allappoq.

Matumani assersuutigalugu mingutsitsinaveersaarnermi suleqatigiinneq ilaavoq. EU-mit nunatsinni ilinniartitaanermut ukiunut arfineq-marlunut tapiissuteqarnerup nutaap ilaa mingutsitsinaveersaarnermut atorneqassaaq. Tassa imaappoq nukissiutinut ataavartunut, brintimik tunisassiornermut, silap pissusianut ilisimatusarnermullu.