Múte EU-p allaffissaa pillugu: Ineriartortitsinissamut periarfissatsialak

EU Issittup 'sakkulersorfiunnginnissaanut attanneqarsinnaasumillu ineriartornissaanut' ikioqataajumalluni Issittumi pitsaanerusumik inissisimaniarpoq.

Taamaammat EU-Kommissioni EU-p Issittumi najuunnerunissaanut suliaqarnerunissaanullu siunertaqarluni Nuummi allaffimmik pilersitsiniarpoq.

Tamanna EU-Kommissionip pingasunngornermi nalunaarutigaa, ullormi taanna aamma Issittumut periusissiani saqqummiuppaa.

Tamannalu Naalakkersuisut siulittaasuannit, Múte B. Egedemit, tupaallaatigineqanngilaq.

AAMMA ATUARUK EU-Kommissioni Issittumi inissisimalluarneruniarluni Nuummi allaffeqalerusuttoq

- Tupaallannanngilaq. Piffissami kingullermi, ukiuni kingullerni aamma ukiuni aggersuni, nunarput Issittorlu annertoorujussuarmik nunarsuarmioqatitsinnit soqutigineqarpoq, oqarpoq.

Nunarput EU-mut ilaasortaanngilaq, EU-mulli assigiinngitsutigut ukiorpassuanngortuni suleqateqartarpoq.

Taamaammat Issittup ineriartortinneqarnerani Nunatta aqutseqataasinnaanerminut periarfissamik atorluaasinnaasoq Múte B. Egede isumaqarpoq.

AAMMA ATUARUK Ataatsimiititaliaq EU-p allaffissaa pillugu: Nunarput soqutigineqaleraluttuinnarpoq

- Nunanik pissaanilissuarnik, assigiinngitsunillu, suleqateqarnikkut ineriartorluarsinnaaneranut isumaqarpunga una aamma alloriarnertut atorluarneqarsinnaasoq, oqarpoq.

Múte B. Egedemmi oqarnera naapertorlugu EU-p Nunatsinni allaffeqalerneratigut ulluinnarni suleqatigiinnermut nukittorsaanissamut periarfissamik alloriartitsivoq.

- Nalunngereerparput Nunatsinni, soorlu islandimiut amerikamiullu aallartitaqarfeqarnerat aallaavigalugu oqaloqatigiinnerit suleqatigiiffiusinnaasullu annertusarneqarneri tassuuna aqqutissiuunneqarmata, taamaammat Nunatsinnut iluaqutaasussanik ineriartortitsiviusussatut una isigivara, oqarpoq.