Brexitip halloweenip tungaanut kinguartinnissaa neqeroorutigineqartoq

Nunat EU-mut ilaasortat 27-t siuttuisa Bruxellesimi ataatsimiinnermi Brexitip kinguarteqqinnissaanut nutaamik neqerooruteqarniarlutik isumaqatigiissutigaat.

EU-p præsidentiata Donald Tuskip Twitterikkut tamanna ilisimatitsissutigaa. Taassuma tuluit premierministeriat Theresa May, nunatsinni nalunaaqutaq malillugu ippassaq unnukkut nal. 21 naapippaa, nunallu 27-t isumaqatigiissutigisaat saqqummiullugu.

Nunat EU-mut ilaasortaasut 27-it Brexitip ukioq manna oktobarip 31-ata tungaanut kinguartinneqarsinnaanera isumaqatigiissutigaat. Suliap juunimi killiffissiorneqarnissaa isumaqatigiissummut ilaasoq, diplomatinit ataatsimeersuarnermut peqataasunit tusarfiit tamanna upperarsarpaat.

AAMMA ATUARUK May tunuarniarpoq, brexitimik isumaqatigiissut akuerineqarpat

Ulloq avissaarnissamut killiliussatut saqqummiunneqartoq nunat kingusinnerusumut kinguartitsinissamik kissaateqartut Frankrigillu sivikitsuinnarmik kinguartitsinissamik kissaateqartup naaperiutigalugu isumaqatigiissutigaat.

Tuluit Nunaanni Europa-Parlamentimut maajip naanerani qinersisoqarnissaa isumaqatigiissummi piumasaqaatigineqassaaq.

EU-Kommissionimi ilaasortat oktobarip 31-ani nikinnissaat aamma oktobarip 31-ani pissaaq, taamatullu aaqqiissuteqartoqarneratigut EU-kommissærimik Tuluit Nunaanneersumik ivertitsisoqarnissaa pisariaarutissaaq.

/ritzau/